प्रमाणीकरण गरिएकाे नागरिकता विधेयक संसदमा फिर्ता ल्याएर छलफल गर्नुपर्छ : ओली

२२ जेठ, काठमाडौं । प्रमुख प्रतिपक्षी एमाले संसदीय दलका नेता केपी शर्मा ओलीले हालै राष्ट्रपतिबाट प्रमाणीकरण गरिएकाे नागरिकता विधेयकलाई नयाँ संसदमा ल्याएर छलफल गर्नुपर्ने बताएका छन् । 

उनले सोमबार बसेको प्रतिनिधिसभाको बैठकमा धारणा राख्दै विधेयक प्रमाणीकरणका लागि अपनाएको प्रक्रिया गलत भएको बताए । अघिल्लो संसदले पठाएको विधेयक तत्कालीन राष्ट्रपतिबाट प्रमाणीकरण नभएपछि निष्क्रिय रहेको अवस्थामा रहेको र जन जनमतबाट निर्वाचित राष्ट्रपतिबाट प्रमाणीकरण हुन नसक्ने बताए । 

‘निष्क्रिय अवस्थामा रहेको विधेयकलाई मन्त्रिपरिषदले गरेको सिफारिसका आधारमा प्रमाणीकरण गर्ने कार्य संविधानले चिन्दैन,’ उनले भने, ‘यसलाई नयाँ संसदमा ल्याएर छलफल गराएपछि मात्र विधेयक ऐन बन्न सक्छ, त्यसकारण संसदमा फिर्ता ल्याएर छलफल गर्नै पर्छ ।’ नयाँ संसद बनिसकेको अवस्थामा हरेक विधेयकलाई संसदले चिन्नु जरुरी रहेको बताए । एमाले, रास्वपा र राप्रपाका सांसदहरुले विधेयकलाई संसदमा ल्याएर आफूहरूले छलफल गर्न पाउनुपर्ने माग गर्दै आएका छन् ।

सरकारको गलत सिफारिस र राष्ट्रपतिबाट भएको असंवैधानिक प्रमाणीकरणकै कारण अदालतले रोकेको उनको तर्क थियो । यही जेठ १७ मा राष्ट्रपति रामचन्द्र पौडेलले मन्त्रिपरिषद बैठकले प्रमाणीकरणका लागि गरेको अनुरोधका आधारमा प्रमाणीकरण गरेका थिए । प्राथमिकीकरणको २ दिनपछि जेठ १९ मा नेपाल राजपत्रमा प्रकाशित भई ऐन बनिसकेको छ । 

तर प्रमाणीकरण विरुद्ध सर्वोच्च अदालतमा परेको मुद्दामा सर्वोच्चले ऐन कार्यान्वयन नगर्न अल्पकालीन अन्तरिम आदेश दिएको छ । अन्तिम फैसलाका लागि मुद्दाका दुवै पक्षलाई सर्वोच्चले बोलाएको छ ।