आर्थिक चलखेलपछि चोरीको आरोपमा पक्राउ परेका सुन व्यवसायी राति छुटे

२३ जेठ, दाङ । सुन चोरीको आरोपमा पक्राउ परेका घोराहीका सुनचाँदी व्यवसायीलाई प्रहरीले मध्य राति छाडेको छ । घोराही निमा हल रोड नजिकै रहेको सन्तोष सुनचाँदी पसलका सञ्चालक खड्ग सेर्पाइलीलाई प्रहरीले चोरीको सुन किनेको आरोपमा पक्राउ गरेको थियो । तर प्रहरीले उनलाई शुक्रबार मध्ये राति नै छाडेको छ ।

चोरीको सुन किन्ने आरोपी व्यवसायीलाई मुद्दा चलाउनुको साटो जिल्ला प्रहरी कार्यालय दाङले उनलाई उन्मुक्ति दिएको छ । स्रोतका अनुसार प्रहरीले १० लाखबाट बार्गेनिङ गर्न सुरु गरेपनि अन्तिममा ५ लाखमा मुद्दा नचलाउने सर्तमा आरोपी सेर्पाइलीलाई छाडेको हो । जिल्ला प्रहरी कार्यालय दाङका डीएसपी राजन गौतममाथि मुद्दा मिलाउन सहजीकरण गरेको आरोप लागेको छ ।

डीएसपी गौतमलाई जिल्ला प्रहरी प्रमुख वीरबहादुर वलीले संरक्षण गर्दै आइरहेका छन् । डीएसपी गौतमलाई मुद्दामा सहजीकरण गर्न लगाएर एसपी वलिले पीडितहरुबाट पैसा उठाउने गरेको स्रोतको दावी छ । यसअघि पनि स्कुटर चोरीको आरोपमा पक्राउ परेकालाई पनि डीएसपी गौतमले मिलेमतोमा छाडेका थिए । चोरीको सुन किनेको आरोपमा पक्राउ परेका व्यवसायी छुटे लगत्तै डीएसपी गौतम बिदा बसेका छन् । यो विषयमा एसपी वलीसँग सम्पर्क गर्दा उनीसँग सम्पर्क हुन सकेन ।

तर डीएसपी गौतमले भने उनलाई छाडेको स्वीकार गरेका छन् । ‘चार आना सुन किनेको रहेछ, उसलाई बोलाएको बेला हाजिर हुने गरी छाडिएको छ’, डीएसपी गौतमले भने । कानुन त उनलाई पनि मुद्दा चलाउनु पर्ने भएपनि डीएसपी गौतमकै जोडबलमा छाडिएको जिल्ला प्रहरी दाङका एक प्रहरी अधिकारीको दावी छ ।