पाँचखालको औद्योगिक ग्रामलाई बनाइयाे महिला उद्योगी औद्योगिक ग्राम

२४ जेठ, काठमाडौं । सरकारले काभ्रे पलाञ्चोकको पाँचखालस्थित निर्माणधीन औद्योगिक ग्रामलाई महिला उद्योगी विशेष औद्योगिक ग्राममा परिणत गर्ने निर्णय गरेको छ ।

बुधबार बसेको मन्त्रिपरिषद्को बैठकले उद्योग वाणिज्य आपूर्ति मन्त्रालयको प्रस्तावमा पाँचखाल नगरपालिकामा रहेको औद्योगिक ग्रामलाई महिला उद्योगी विशेष औद्योगिक ग्राम बनाउने निर्णय गरेको हो । सो निर्णयको जानकारी सरकार प्रवक्ता र संचार तथा प्रविधि मन्त्री रेखाकुमारी शर्माले दिएकी छन् । 

बैठकले कृषि तथा पशुपक्षी मन्त्रालयको प्रस्तावमा कालिमाटी फलफूल तथा तरकारी बजार विकास समितिको अध्यक्षमा सहसचिव मदन भुजेललाई नियुक्त गर्ने निर्णय गरिएको उनले जानकारी दिइन् । 

यस्तै, गृह मन्त्रालयको प्रस्तावमा आवश्यक सेवा सञ्चालन ऐन २०१४ दफा ३ को उपदफा १ बमोजिम आवश्यक सेवामा हड्ताल गर्न नपाइने सूचना जारी गर्ने र यसलाई राजपत्रमा प्रकाशित गर्ने निर्णय भएको छ । ६–६ महिनामा प्रकाशित गर्नुपर्ने प्रावधान अनुसार यो निर्णय गरिएको मन्त्री शर्माले जानकारी दिइन् ।

वन तथा वातावरण मन्त्रालयको प्रस्ताव अनुसार माथिल्लो मयुङ खोला जलविद्युत आयोजनाका लागि रसुवा र नुवाकोट जिल्लामा रहेको वन प्रयोग गर्न दिन र रुख कटान गर्न स्वीकृति दिने निर्णय गरिएको छ ।

सरकारले प्रस्तुत गरेको आगामी आर्थिक वर्ष २०८०/८१ को वार्षिक बजेटमा औद्योगिक ग्रमलाई महिला उद्यमी विशेष औद्योगिक ग्राममा परिणत गर्ने उल्लेख छ । बजेटमाथि संसदको दुवै सदनमा जछफल चलिरहेको छ ।