बजेटमाथिको छलफल सकियो, अर्थमन्त्रीले सोमबार जवाफ दिने

२८ जेठ, काठमाडौं । सरकारले ल्याएको आगामी आर्थिक वर्ष २०८०/८१ को बजेट माथिको छलफल सकिएको छ । आइतबार बसेको प्रतिनिधिसभाको बैठकमा दर्जनभन्दा बढी सांसदहरुले छलफलमा भाग लिएका छन् ।

बैठकमा बजेटमाथिको छलफलको कार्यक्रम पूरा भएको जानकारी दिँदै सभामुख देवराज घिमिरे अर्को बैठक भोलि सोमबारा बिहान ११ बजे बस्ने जानकारी दिएका छन् । भोलिको बैठकमा अर्थमन्त्री डा. प्रकाशशरण महतले छलफलका क्रममा सांसदहरुले उठाएका प्रश्नको जवाफ दिने जानकारी दिए । 

बजेटमाथि गएको आइतबारदेखि सांसदहरुले छलफलमा भाग लिएका थिए । प्रतिपक्षी सांसदहरुले मात्र नभई बजेटप्रति सत्ता पक्षकै सांसदहरुले प्रश्न उठाउँदै सुधार गर्न थु्प्रै सुझाव दिएका छन् ।

मन्त्री महतले जवाफ दिएपछि पारितका लागि सभामुख घिमिरेले प्रस्ताव गर्नेछन् । प्रमुख प्रतिपक्षी एमालेले बजेटको विपक्षमा उभिने घोषणा गरिसकेको छ भने सत्तारुढ एकीकृत समाजवादी र जसपाले मन्त्री महतबाट चित्ताबुझे जवाफ नआए समर्थन नगर्ने बताएका छन् ।