मुख्यसचिवबाट राजीनामा गराएर शंकरदास बैरागीलाई राष्ट्रिय सुरक्षा सल्लाहकारमा नियुक्त

३२ जेठ, काठमाडौं । सरकारले यसअघि मुख्यसचिव रहेका शंकरदास  बैरागीलाई राष्ट्रिय सुरक्षा परिषदको सल्लाहकारमा नियुक्त गरेको छ । बैकुण्ठ अर्याललाई मुख्यसचिवमा नियुक्ति गर्नुअघि उनी नेपाल सरकारकाे मुख्यसचिव थिए । 

३ महिनापछि अवकाश पाउन लागेका बैरागीलाई मुख्यसचिवबाट राजीनामा गराएर राष्ट्रिय सुरक्षा परिषदको सल्लाहकारमा नियुक्त गरिएको हो । 

वैरागी पहिलो राष्ट्रिय सुरक्षा सल्लाहकारसमेत बनेका छन् । अन्य मुलुकमा राष्ट्रिय सुरक्षा सल्लाहकार हुने गरे पनि नेपालमा भने राष्ट्रिय सुरक्षा परिषदको अध्यक्ष स्वयं प्रधानमन्त्री रहने व्यवस्था छ ।

त्यस्तै रक्षा मन्त्रालयका सचिव राष्ट्रिय सुरक्षा परिषदको सदस्य–सचिवको जिम्मेवारीमा हुन्छन् । त्यस्तै परिषदमा रक्षामन्त्री, गृहमन्त्री, परराष्ट्रमन्त्री, अर्थमन्त्री, नेपाल सरकारमा मुख्य सचिव र प्रधानसेनापति सदस्य रहन्छन् ।

मन्त्रिपरिषद बैठकपछि परराष्ट्रमन्त्री एनपी साउदले वैकुण्ठ अर्याललाई मुख्य सचिव र बैरागीलाई सुरक्षा सल्लाहकारमा नियुक्त गरिएको जानकारी दिए । प्रधानमन्त्रीको सचिवालयका अनुसार बैरागीले सल्लाहकारका रूपमा प्रधानमन्त्री पुष्पकमल दाहालबाट शपथसमेत लिइसकेका छन् ।