भोलिदेखि आईएमई लाइफ इन्स्योरेन्सले प्रिमियममा आईपीओ जारी गर्ने

३२ जेठ, काठमाडौं । आईएमई लाइफ इन्स्योरेन्सले वैदेशिक रोजगारीमा रहेका नेपालीलाई शुक्रबार १ असारदेखि आईपीओ निष्काशन गर्ने भएको छ । 

कम्पनीले प्रति कित्ता १३६ रुपैयाँ ९१ पैसा प्रिमियम थप गरेर २३६ रूपैयाँ ९१ पैसाका दरमा १ करोड २० लाख कित्ता आईपीओ जारी गर्न लागेको हो । यस मध्य १२ लाख कित्ता शेयर वैदेशिक रोजगारीमा रहेका नेपालीलाई निष्काशन खुला हुनेछ ।  

त्यस्तै, ६ लाख कित्ता शेयर कर्मचारी र अर्को ६ लाख कित्ता शेयर सामूहिक लगानी कोषका लागि सुरक्षित गरिएको छ । सर्वसाधारणले बाँकी रहेको ९६ लाख कित्ता सेयरका लागि आवेदन दिन सक्नेछन् । 

वैदेशिक रोजगारीमा रहेका नेपालीले यसमा असार १५ गतेसम्म आवेदन दिन सक्नेछन् । न्यूनतम् १० कित्तादेखि अधिकतम १० हजार कित्ताका लागि आवेदन दिन पाइनेछ । 

रेटिङ एजेन्सी केयर नेपालले आईएमई लाइफ इन्सुरेन्सको आईपीओलाई ‘केयरएनपी त्रिपल बी प्लस इस्यूअर रेटिङ’ प्रदान गरेको छ । 

जसले कम्पनीको दायित्व बहन गर्ने क्षमतामा मध्यम स्तरको जोखिम रहेको जनाउँछ । यो आईपीओमा सिभिल क्यापिटल बिक्री प्रबन्धक रहेको छ ।