काेशी प्रदेश प्रमुखद्वारा बजेट अध्यादेश जारी, बजेट आजै

३२ जेठ, विराटनगर । कोशी प्रदेशमा बजेट अध्यादेश जारी भएको छ । मन्त्रिपरिषद्को सिफारिसमा प्रदेश प्रमुख परशुराम खापुङले बिहीबार आर्थिक अध्यादेश र विनियोजनसम्बन्धी अध्यादेश जारी गरेका हुन् ।

प्रमुख कार्यालयका प्रवक्ता नरेन्द्रकुमार श्रेष्ठद्वारा जारी विज्ञप्ति अनुसार संविधानकाे धारा २०२ काे (१) बमाेजिम प्रदेश प्रमुख खापुङद्वारा ‘काेशी प्रदेश आर्थिक अध्यादेश २०८०’ र ‘काेशी प्रदेश आर्थिक विनियाेजन अध्यादेश २०८०’  जारी गरेका हुन् ।

सोही अध्यादेशमार्फत प्रदेश सरकारले भोलि आगामी आर्थिक वर्षको बजेट ल्याउने तयारी गरेको छ । 
मुख्यमन्त्री एमालेका हिक्मतकुमार कार्कीको सरकार अल्पमतमा परेपछि अध्यादेशको बलमा बिहीबार नै बजेट ल्याउने तयारीमा सरकार लागेको छ ।

अध्यादेशमार्फत बजेट ल्याउने तयारी भइरहेको मुख्यमन्त्रीका प्रेस सल्लाहकार महेन्द्र विष्टले बताए । सरकारले हिजै मात्र आगामी आवको वार्षिक नीति तथा कार्यक्रम ल्याएको थियो । नीति तथा कार्यक्रम  सर्वजनिक गरेलगत्तै गएराति १२ बजेट प्रदेसभाको बजेट अधिवेशन अन्त्य गरेको थियो । 

विपक्षी दलहरु नेपाली कांग्रेस, माओवादी केन्द्र, जसपा, एकीकृत समाजवादीले प्रदेश सरकारले संविधान मिचेर नीति तथा कार्यक्रम ल्याएको बताएका छन् । अध्यादेशबाट बजेट ल्याइए प्रतिवाद गर्ने बताएका छन् । उनीहरुले मुख्यमन्त्री कार्कीलाई तत्काल पदबाट राजीनामा दिन माग गरेका छन् ।