पहिला गोरखा, डडेल्धुरा र नुवाकोटको बजेट कटौती गर्नुपर्छ : चित्रबहादुर केसी

३२ जेठ, काठमाडौं । राष्ट्रिय जनमोर्चा नेपालका अध्यक्ष समेत रहेका सांसद चित्रबहादुर केसीले सरकारले आगामी आवको बजेटमा चरम फक्षपात गरेको बताए । उनले डडेल्धुरा, गोरखा र नुवाकोटका लागि बजेटको पूँजीगततर्फको ५१ प्रतिशत बजेट खन्याएको भन्दै आक्रोश व्यक्त गरे । 

बिहीबार प्रतिनिधिसभाको बैठकमा मन्त्रालयगत विनियोजन विधेयकमाथि छलफल गर्दै सांसद केसीले भने, ‘बजेटको ५१ प्रतिशत ३ जनाको भागमा, बाँकी अरु सांसदहरुको क्षेत्रमा बाँडिएको छ । विधेयकमाथि छलफल गर्ने हो भने, गोरखा, डडेल्धुरा र नुवाकोटको बजेट कटौती गरौं । नत्र छलफलका औचित्य छैन ।’

उनले सरकारमा मन्त्री नरहेकै कारण बाग्लुङमा बजेट नपरेको बताए । गोरखा प्रधामन्त्री प्रचण्ड, डडेल्धुरा सरकारका प्रमुख घटक कांग्रेस सभापति शेरबहादुर देउवा र नुवाकोट डा. प्रकाशशरण महतको निर्वाचन क्षेत्र रहेको जिल्ला हुन् । 

उनले मुलुकमा सबैभन्दा बढी बिजोग ज्येष्ठ नागरिकको रहेको बताए । देशभित्र रोजगार नहुँदा छोराछोरी विदेश पलायन भएको र उनीहरु घर फिर्ता भएपनि बाबुआमाको हेरचाह गर्नबारे ध्यान नदिएको बताए । सामाजिक मूल्य मान्यता उनीहरुमा हराउँदै गएको उनको टिप्पणी छ ।