संसदमा बिन्दाबासिनीको पहिलो सम्बोधनः ‘सरकार र सदन टाढा छन्, जलन उपचार कोष बनाइयोस्’

३२ जेठ, काठमाडौं । रास्वपाकी समानुपातिक सांसद बिन्दाबासिनी कंसाकारले सांसद बनेदेखि पहिलो पटक संसद बैठकमा सम्बोधन गरेकी छन् ।

बिहीबार संघीय संसदअन्तर्गत प्रतिनिभिसभाको बैठकमा विनियोजन विधेयकमाथि छलफलमा भाग लिँदै सांसद कंसाकारले मुलुकमा जलनसम्बन्धी कानूनको अभावमा जलनमा परेका पीडितले सही समयमा उचित उपचार र भरणपोषण पाउन नसकेको बताइन् । 

एसिड प्रहारबाट पीडित सांसद कंसाकारले संसदको यसै अधिवेशनबाट जलनसम्बन्धी कानून बनाउन सांसदहरुसँग भूमिका खेल्न आग्रह गरिन् । हरेक झोल पदार्थ वा वस्तुबाट हुने जलनका कारण दैनिक रुपमा व्यक्तिले भौतिक र मानसिक पीडा व्यहोर्न विवश भइरहेको बताउँदै उनीहरुको उपचार र संरक्षणका लागि जलनसम्बन्धी कानून बनाउनुपर्ने बताए । 

जलन गम्भीर दुर्घटना रहेपनि यसबारे सरकार र सदन (संसद) बेखर रहेको वा उपचार खर्च व्यहोर्नबाट टाढा हुन खोजेको कुराप्रति सदन निष्कर्षमा पुग्नुपर्ने बताइन् । 

उनले यसै अधिवेशनबाट जलन पीडित उपचार कोष स्थानपना गर्न सरकारको ध्यानाकर्षण गराइन् । ‘जलन दुर्घटना हो, दुर्घटनामा परेका व्यक्तिलाई तुरुन्त पीडा सुरु हुन्छ, उसलाई तुरुन्तै उपचार आवश्यक पर्छ’ उनले भनिन्, ‘यसनिम्ति बिना हिच्किचाहट जलन उपचार कोष स्थापना गरौं ।’

कंसाकार रास्वपाको समानुपातिकतर्फका सांसद ढककुमार श्रेष्ठ घुस काण्डमा निलम्बनमा परेपछि सो स्थानमा केही हप्ता पहिलेमात्र पार्टीको सिफारिसमा नियुक्त भएकी हुन् । आजको सम्बोधन उनको पहिलो सम्बोधन हो । महिला, बालबालिका तथा ज्येष्ठ नागरिक मन्त्रालयमाथि विनियोजन विधेयकबारे बोल्ने क्रममा उनले कोष स्थापनाको विषय उठाएकी हुन् ।