अमेरिकी सैन्य सुराकी विश्लेषक एक सातादेखि गुपचुप नेपालमा !

१ असार, काठमाडौं । अमेरिकी सैन्य सुराकी विश्लेषक तथा कूटनीतिज्ञ काठमाडौं आएको एक साता बितेको छ । भिक्टोरिया आन रिज्याक कतारको राजधानी दोहा हुँदै २५ जेठमा  कतार एअरवेजको उडान नम्बर क्युआर ६४६ मा आएकी भएपनि त्यसको विषयमा कोही पनि जानकार देखिएका छैनन् । उच्च सुरक्षा अधिकारीहरूले उनको पिछा गरेपछि उनी कुन होटलमा बसेकी छिन भन्ने बारेमा पनि जानकारी पाउन सकेका छैनन् ।

काठमाडौं झरे लगत्तै अमेरिकी दूतावासभित्र छिरेकी उनी बाहिर निस्केको वा ननिस्केको बारेमा जानकारी पाउन सकेका छैनन् । सुरक्षा अधिकारीहरूले उनी भूटानी शरणार्थीको विषयमा चासो र जानकार राख्न आएकी हुन् । शुक्रबारसम्म उनले नेपालका उच्च अधिकारीहरूलाई भेटघाट गरेको अनुमान गरिएको छ । 

भिक्टोरियासँग विश्वका विभिन्न मुलुकको सैन्य सुराकी सम्बन्धी लामो अनुभव रहेको बताइन्छ । उनी कोरियास्थित अमेरिकी जल सेनाको टोलीमा सुराकी योजना विज्ञका रुपमा सन् २०२० देखि २०२२ सम्म साढे दुई वर्ष कार्यरत थिइन् । त्यसै गरी सन् २०१८ को डिसेम्बरदेखि सन् २०१९ को डिसेम्बरसम्म एक वर्ष फ्रान्समा रहिन् । पेरिसस्थित अमेरिकी दूतावासमा उनी असिस्टेन्ट डिटेचमेण्ट कमान्डर रहेको बताइन्छ । सोही हैसियतमा उनी बेइजिङस्थित अमेरिकी दूतावासमा डिसेम्बर २०१७ देखि २०१८ को डिसेम्बरसम्म एक वर्ष बसेकी थिइन् ।

त्यसअघि इजिप्टको राजधानी कायरोस्थित अमेरिकी दूतावासमा थिइन् । मरिन सेक्युरिटी गार्डको जिम्मेवारीमा उनी २०१६ डिसेम्बरदेखि २०१७ डिसेम्बरसम्म कार्यरत रहेको बताइन्छ । उनी सन् २०१२ सेप्टेम्बरदेखि अक्टोबर २०१६ सम्म अमेरिकी जल सेनाको साइबरस्पेस कमाण्डमा साइबर इन्टेलिजेन्स एनालिष्टको हैसियतमा थिइन् ।

स्रोत भन्छ, ‘अन्ना मे २०१० देखि अगष्ट २०१२ सम्म अमेरिकी जलसेनाको जापानस्थित थ्रीडी मरिन लजिस्टिक ग्रुप, सीएलआर ३७ मा अल सोर्स इन्टेलिजेन्स एनालिष्ट थिइन् । उनै अमेरिकी कूटनीतिज्ञ तथा सुराकी विशेषज्ञ जेठ २५ मा काठमाडौं ओर्लेको अध्यागमन विभागले सुरक्षाकर्मीहरूलाई जानकारी गराएको थियो ।

नेपाल प्रहरीको विशेष ब्यूरो, सशस्त्र प्रहरीको इन्टेलीजेन्स व्यूरो र राष्ट्रिय अनुसन्धान विभाग तीन वटै निकायले उनको निगरानी गरेका थिए । तर अहिलेसम्म एक पटक सोल्टी होटलमा देखेको बाहेक अन्य सुराक पाउन सकेका छैनन । उनले त्यहाँ को को सँग भेटघाट गरिन भन्ने बारेमा पनि सुरक्षा निकायले भेउ पाउन सकेकी छैनन् ।

गत माघमा पनि यस्तै एउटा टोली आएर नेपालमा भूटानी शरणार्थीको बारेमा चासो लिएको थियो । त्यसकै उपजका रुपमा शरणार्थीसम्बन्धी अनुसन्धान भएको थियो । अहिले पनि मुद्दा सुनुवाईकै क्रममा उनी नेपाल आएकी हुन् । शुक्रबार सुनुवाई सकिएकाले उनी फिर्ता हुने आशंका सुरक्षा अधिकारीहरूको छ ।