बाढी–पहिरोबाट १० जनाकाे मृत्यु, ५४ घर पूर्णरुपमा क्षतिग्रष्त : गृहमन्त्री

५ असार, काठमाडौं । उपप्रधान तथा गृहमन्त्री नारायणकाजी श्रेष्ठले शनिबार रातिदेखि पूर्वी क्षेत्रका विभिन्न जिल्लामा गएको बाढी र पहिरोबाट ५४ घरमा पूर्ण रुपमा क्षति पुगेको १० जनाको मृत्यु भएको जानकारी दिएका छन् ।

प्रतिनिधिसभाको आजको बैठकमा आकस्मिक समायमा बोल्दै भारी वर्षाबाट पाँचथर, ताप्लेजुङ, संखुवासभा र झापामा गरी १० जनाको निधन भएको र २६ जना बेपत्ता रहेकाे साथै ५४ घरमा पूर्णरुपमा क्षति पुगेको जानकारी दिए ।

बाढीबाट संखुवासभाको हेवा खोलामा रहेको २ वटा मोटरेबल र २ वटा झोलुङगे पुल बगाएको र एउटा झोलुङगे पुलमा क्षति पुगेको बताए । ताप्लेजुङको सिदिङवा गाउँपालिका–६ का ३९ घरपरिवारलाई सुरक्षित स्थानमा स्थानान्तरण गरिएको जानकारी दिए ।

क्षतिको विवरण संकलन कार्य भइरहेको र घाइतेको उपचार, राहतको कार्य तीव्र गतिमा भइरहेको बताए । भौतिक पूर्वाधार मन्त्रालयले सडक र पुलतर्फ मात्र बाढी र पहिरोबाट ५० करोडबराबरको क्षति भएको जनाएको छ ।