अहिले भ्यू टावर आवश्यकता छैन: कार्की

५ असार, काठमाडौं । नेपाली कांग्रेसका सांसद एवं पूर्वअर्थमन्त्री ज्ञानेन्द्रबहादुर कार्कीले मुलुकका लागि ठूल्ठुला भ्यू टावर र सिटी हलको आवश्यकता नभएको बताएका छन् । प्रतिनिधिसभा बैठकमा विभिन्न मन्त्रालयका लागि विनियोजित बजेटका शीर्षकमाथिको छलफलमा मंगलबार भाग लिँदै उनले भ्यू टावरको आवश्यकता नरहेको बताएका हुन् ।

सांसद कार्कीले देशको कुनै एउटा ठाउँमा भए पनि ऐतिहासिक हरित र सांस्कृतिक सहर निर्माण गर्ने काममा ध्यान दिन सरकारलाई सुझाव दिएका थिए । उनले गरिब आवास कार्यक्रमलाई झारा टार्ने ढंगले अघि नबढाउन पनि सरकारलाई सचेत गराएका थिए ।

‘हामीले बजेटमा उल्लेख गरेका छौं–अति विपन्न, लोपोन्मुख, दलित र सिमान्तकृत नागरिकहरूलाई आवास दिने बजेटमा हामीले जुन कुरा उल्लेख गरेका छौं । कमसेकम हाम्रो मन्त्रीको कार्यकालमा देखिने हिसाबले यो क्षेत्रमा विकास होस भन्ने म चाहन्छु । अहिले हामीलाई ठूल्ठुला सहरको भन्दा गाउँलाई सहर बनाउने होइन । गाउँलाई सुविधासम्पन्न र व्यवस्थित गाउँ निर्माण गर्ने दिशामा पनि यो मन्त्रालयको ध्यान जान जरुरी छ ।’ 

सांसद कार्कीले अहिले सरकारको ध्यान दलित, विपन्न र सिमान्तकृत नागरिकलाई आवास उपलब्ध गराउनेमा हुनुपर्ने बताए । उनले बजेटमा उल्लेख गर्ने तर काम नगर्ने जस्तो व्यवहार सही नभएको बताए । स्वच्छ खानेपानी पाउने नागरिकको अधिकारलाई सुनिश्चित गर्न पनि सांसद कार्कीले सरकारको ध्यानाकर्षण गराए ।