वाणिज्य बैंकमा एकैदिन ६ अर्ब निक्षेप थप, मुख्य कारण न्यून कर्जा प्रवाह

६ असार, काठमाडौं । वाणिज्य बैंकहरुमा पछिल्लो एक दिनमा ६ अर्ब रुपैयाँ निक्षेप थपिएको छ । यही असा र ३ गते एकैदिन ६ अर्ब रुपैयाँ निक्षेप थप भएको हो । असार २ गते वाणिज्य बैंकहरुमा ४९ खर्ब ११ अर्ब रहेको निक्षेप एकैदिन ६ अर्बले बढेर ४९ खर्ब १७ अर्ब पुगेको हो । 

योसँगै असार ३ गतेसम्ममा  बैंक तथा वित्तीय संस्थामा कुल ५५ खर्ब ७३ अर्ब रुपैयाँ निक्षेप पुगेको छ । जसमध्ये ४९ खर्ब १७ अर्ब रुपैयाँ निक्षेप वाणिज्य बैंकमा रहेको छ । 

कर्जा प्रवाह न्यून हुँदा बैंक तथा वित्तीय संस्थाहरुमा निरन्तर निक्षेप थपिँदै गइरहेको छ । बैंक तथा वित्तीय संस्थाले पछिल्लो चरणमा दैनिक १ अर्ब रुपैयाँ पनि कर्जा प्रवाह गर्न सकेका छैनन् ।

कर्जा ब्याज दर महंगो भएको जनाउँदै लगानीकर्ताहरु ऋण लिनबाट पछि हटेका हुन् । अर्थ मन्त्रालयलाई ब्याजदर कम गर्न दबाब पनि बढ्दै गएको छ । बैंक तथा वित्तीय संस्थामा कर्जा निक्षेप अनुपात (सीडी रेसियो) ८३.८८ प्रतिशतमा पुगेको छ भने अन्तर बैंक सापटीको ब्याजदर ४.५१ प्रतिशतमा झरेको छ ।