ट्रेड युनियन कांग्रेसको निर्वाचनमा उम्मेदवारको मनोनयन दर्ता, अध्यक्षका लागि यादव र कुँवर प्रतिस्पर्धामा

६ असार, काठमाडौं । नेपाली कांग्रेस निकट नेपाल ट्रेड युनियनको आगामी कार्यकालका लागि निर्वाचन सुरु भएको छ । यो निर्वाचनमा दुई समूहबीच प्रतिस्पर्धा हुँदैछ । आगामी कार्यकालको नेतृत्वका लागि महेन्द्र यादव र योगेन्द्र कुँवर चुनावी मैदानमा उत्रिएका छन् । अध्यक्ष पदमा अन्य स्वतन्त्र उम्मेदवारहरूले पनि मनोनयन दर्ता गएका छन् । 

मंगलबारदेखि सुरु भएको निर्वाचनमा आज उम्मेदवारहरूले मनोनयन दर्ता गराएका छन् । उम्मेदवारको मनोनयन सकिएपछि मतदान पक्रिया सुरु गर्ने तयारी भइरहेको छ । निर्वाचन समितिले दिउँसो २ बजेदेखि मतदान सुरु गर्ने जनाएपनि अपरान्ह ४ बजेपछि मात्रै मतदान सुरु हुनसक्ने बताइएको छ । 

मनोनयन दर्ता ढिला भएकाले मतपत्र नछापिएको र मतपत्र छाप्न समय लाग्ने भएकाले ढिलो गरी मतदान सुरु हुने निर्वाचन समितिले जनाएको छ । अहिले मतपत्र छाप्ने काम भइरहेको छ । दुई प्यानलमा विभाजित उम्मेदवारहरू मनोनयन दर्ता पछि आफ्नो पक्षमा मत मागिरहेका छन् ।

अध्यक्ष पदमा प्रतिस्पर्धा गरिरहेका महेन्द्र यादव संस्थापन इतर समूहका उम्मेदवार हुन भने भोगेन्द्र कुँवर संस्थापन पक्षबाट उम्मेदवार बनेका छन् । कुँवर यसअघि संस्थापन इतर समूहमा थिए । उनले गएको निर्वाचनमा इतर समूहबाट चुनाव जितेका थिए । अन्तिम समयमा आएर उनी संस्थापन समूहमा गएका हुन् । 

संस्थापन पक्षबाट अध्यक्ष पदका लागि गतिलो उम्मेदवार नै नभएर कुँवरलाई अध्यक्षको उम्मेदवार बन्न आग्रह गरेपछि उनी संस्थापन समूहमा गएका हुन् । अहिले समूह छोडेर गएको भन्दै कुँवरको आलोचना भइरहेको छ । मतदताहरुले नै कुँवरको आलोचना गरिरहेकाले अध्यक्ष पदमा महेन्द्र यादवकै प्यानलको पल्ला भारी हुने देखिएको छ । निर्वाचन कमलादी स्थित प्रज्ञा भवनमा जारी छ  ।