नेपालले टस जितेर वेस्ट इन्डिजविरूद्ध बलिङ गर्दै

७ असार, काठमाडौं । आईसिसी एकदिवसीय क्रिकेट विश्वकप छनोटमा नेपालले आफ्नो तेस्रो खेल सुरु गर्दैछ । दुई पटकको विश्व विजेता वेस्ट इन्डिजसँग नेपालको यो पहिलो खेल हो । 

जिम्बावेको राजधानी हरारेस्थित हरारे स्पोर्ट्स क्लबमा नेपालले टस जितेर बलिङ रोजेपछि वेस्ट इन्डिजले पहिले ब्याटिङ गर्ने भएको छ ।

नेपालले टिममा कुनै परिवर्तन गरेको छैन। अमेरिकाविरूद्ध मैदान उत्रिएको टिम नै वेस्ट इन्डिजविरूद्ध खेल्नेछ । नेपालले ६ विकेटले अमेरिकालाई हराएको थियो । 

नेपाली टिममा कुशल भुर्तेल, आसिफ शेख, भीम सार्की, रोहित पौडेल, कुशल मल्ल, आरिफ शेख, दीपेन्द्रसिंह ऐरी, गुल्सन झा, ललितनारायण राजवंशी, करण केसी, सन्दीप लामिछाने रहेका छन् ।