कांग्रेस-एमालेको सरकार अहिल्यै बन्ने संभावना छैन : मीन विश्वकर्मा

८ असार, काठमाडौं । नेपाली कांग्रेसका केन्द्रीय सदस्य एवं प्रचार विभाग प्रमुख मीन विश्वकर्माले नेपाली कांग्रेस र नेकपा (एमाले) को सरकार तत्काल बन्ने अवस्था नरहेको बताएका छन् ।

नेता विश्वकर्माले वर्तमान गठबन्धन विस्थापित गरी सरकारका मुख्य घटक कांग्रेस र प्रमुख प्रतिपक्षी एमालेबीच नयाँ समीकरण बनेर नयाँ सरकार गठन हुने अहिल्यै संभावना नरहेको उनले संचारकर्मीहरुसँग बताएका छन् ।

सरकारले आगामी आर्थिक वर्षका लागि प्रस्तुत गरेको बजेटलाई एमालेले अस्वीकार गर्दै आइरहेको छ । सत्ता पक्षकै सांसदहरुले बजेट विभेदकारी र पक्षपाती रहेको भन्दै सुधार गर्नुपर्ने बताउँदै आएका छन् । यहीबेला संसदमा बोल्दै एमालेका सचेतक महेश बर्तौलाले एमालेले चाहे हप्ता दिनमा सरकार ढल्ने अभिव्यक्ति दिएका थिए । 

आजै मात्र प्रतिनिधिसभाको बैठकमा सत्तारुढ दल एकीकृत समाजवादीका सांसदहरुले बजेट सुधार नगरिए पारित गर्न सहयोग गर्न नसकिने बताए । अहिले सरकार बाहिर एमाले, रास्वपा, राप्रपा, नेमकिपाका गरी झण्डै १२० सांसद छन् । सरकार गठन गर्न १३६ सांसदको आवश्यकता पर्छ ।