पशुपति मन्दिरको जलहरी प्रकरण पुनः ब्युँतियोः गुणस्तर र ताैल पत्ता लगाउन सांसदहरुको माग

८ असार, काठमाडौं । पशुपतिनाथ मन्दिरको जलहरी प्रकरण पुनः ब्यूँतिएको छ । प्रतिनिधिसभाको शुक्रबारको बैठकमा पर्यटन मन्त्रालय लगायत गृह, रक्षा, प्रधानमन्त्रीको कार्यालय, राष्ट्रिय योजना आयोगका विनियोजन विधेयकमाथि धारणा राख्दै जलहरीको वजन र गुणस्तर जाँच गर्न माग गरेका हुन् । 

सांसद रामहरि खतिवडा र बुद्धिमान तामाङले पशुपति मन्दिरको जलहरीमा पित्तल बढी मिसाइएको र तोकिएभन्दा १० केजी सुन गायब पारिएको विषयलाई छानबिनबाट सत्यतथ्य बाहिर ल्याउनुपर्ने बताए । 
उनीहरुले प्रकरणलाई एक दुई जना ठूला नेताहरुले दबाएका भरमा जनताको मनबाट नहट्ने भन्दै जलहरीको गुणस्तर जाँच गर्न र गायब पारिएको सुन पत्ता लगाएर दोषीलाई कारवाहीको दायरामा ल्याउन सरकारको ध्यानाकर्षण गराए । सांसद खतिवडाले जलहरी सुनकै भएको, सुन पनि हराएको भनेर कर्मचारी डाँको छोडेर रोएको भरमा प्रकरण सामसुम हुन नसक्ने बताए ।

‘जलहरीमा भ्रष्टाचारको कुरा उठेपछि केही कर्मचारी डाँको छोडेर रोएको सामाजिक संजालहरुमा देखियो’ उनले भने, ‘भ्रष्टाचार भयो भनेर संसदमा उठेको विषय रोएकै भरमा टार्न मिल्दैन, तत्काल छानबिन पर्यटन मन्त्रीको ध्यानाकर्षण गराउन चाहन्छु ।’

सांसद तामाङले विश्वभरका करोडौं हिन्दू धर्मवालम्बीहरुको आस्थाका केन्द्र रहेको मन्दिरमा भ्रष्टाचार भएको विषयलाई गुपचुप बनाउन नमिल्ने बताए । महालेखा परीक्षकको प्रतिवेदनमा समेत जलहरी राख्दा सुन हराएको पाइएको र जलहरीमा सुन भनेर पित्तल धेरै मात्रामा मिसावट गरेको विषय औल्याएको भन्दै तत्काल छानबिन गर्न माग गरे ।

प्रतिनिधिसभाको जारी बजेट अधिवेशनअन्तर्गत भएको यसअघिका बैठकमा माओवादी केन्द्रका सांसद लेखनाथ दाहालले तत्कालीन एमालेका अध्यक्ष केपी शर्मा ओली नेतृत्वले पशुपतिनाथ मन्दिरको ज्योतिर्लिंगमा १०८ केजी वजनको सुनको जलहरी राख्दा पित्तल बढी मिसावट भएको र १० केजी सुन लुकाएर करोडौं भ्रष्टाचार गरेको भन्दै छानबिन गर्न माग गरेका थिए । दाहालको उक्त भनाइप्रति एमालेका सांसदहरुले आपत्ति जनाउँदै संसद बैठक नै अवरुद्ध गरेका थिए ।

पछि प्रधानमन्त्री प्रचण्ड र प्रमुख प्रतिपक्षी दल एमालेका संसदीय दलका नेता समेत रहेका अध्यक्ष ओलीबीच वार्तापछि सांसद दाहालको भनाइ रेकर्डबाट हटाइएको थियो । केही समयदेखि यो विषय गौण बन्दै आइरहेको थियो । यस्तो अवस्थाबीच आजको बैठकमा जलहरीको तौल र गुणस्तर जाँच गर्नै पर्ने आवाज उठेको हो ।