संशाेधित ऐनका आधारमा निरज कामतलाई वंशजको नागरिकता

११ असार, काठमाडौं । जन्मसिद्ध नागरिकका सन्तान मोरङको कटहरी गाउँपालिका– ४ का निरज कामतले वंशजको नागरिकता प्राप्त गरेका छन् । नागरिकता माग गर्दै काठमाडौंको माइतीघरमा शरीरमा पेट्रोल छर्केर आत्मदाहको प्रयास गरेका कामतले सोमबार ‘वंशज’को नागरिकता पाएका छन् । 

उनलाई मोरङका प्रमुख जिल्ला अधिकारी वीरेन्द्रकुमार यादवले संशोधित नागरिकता ऐन २०७९ बमोजिम नागरिकता प्रदान गरेका हुन् । निरजका बाबु किसुनदेव र आमा गुलाबदेवीको नागरिकता जन्मका आधारमा दिइने ‘जन्मसिद्ध’का आधारका छन् ।

आत्मदाहको प्रयासका बेला उनलाई सँगैका धर्नाकारी र सुरक्षाकर्मीले उद्धार गरी वीर अस्पतालको ट्रमा सेन्टरमा पुर्याएर उपचार गराएका थिए ।

प्रधानमन्त्री प्रचण्ड भारत भ्रमणमा निस्केकै दिन गएको जेठ १७ मा राष्ट्रपति रामचन्द्र पौडेलले प्रमाणिकरण गरेपछि बनेको संशोधित नागरिकता ऐनले जन्मका आधारमा नेपाली नागरिकता लिएका बाबुआमाका सन्तान र बाबुको ठेगाना नखुलेका सन्तानलाई वंशजका आधारमा वंशज नागरिकता दिने व्यवस्था गरेको छ । 

ऐनविरुद्ध सर्वोच्च अदालतमा मुद्दा परेपनि सर्वोच्चले ऐन कार्यान्वयन गर्न आदेश दिएको थियो । आदेशपछि मुख्यगरी तराईका जिल्लामा नागरिकता बाँड्ने क्रम तीव्रता चलेको छ ।

यद्यपि उक्त व्यवस्थाको विरोध राजनीतिक तहबाटै भइरहेको छ । एकीकृत समाजादीका नेता साध्यबहादुर भण्डारीले ‘विदेशीलाई नागरिकता दिन जन्मसिद्धका आधार बनाइने गरिएको’ तर्क अगाडि सारेका छन् । उनले यस्तो व्यवस्था विश्वमा अमेरिका र क्यानडामा मात्र रहेको तर्क गरेका छन् । सोही व्यवस्थाअनुसार दुवै देशले शरणार्थी र विदेशीलाई देशमा भित्र्याइरहेको बताउँछन् ।