संसदमा भूमि व्यवस्था मन्त्री श्रेष्ठको प्रष्टिकरण दिने फरक शैली

१२ असार, काठमाडौं । भूमि व्यवस्था, शहरी तथा गरिबी निवारण मन्त्री रञ्जिता श्रेष्ठले मंगलबार प्रतिनिधिसभाको बैठकमा मन्त्रालयको विनियोजित बजेट शीर्षकमाथि उठेका प्रश्नको जवाफ दिएकी छन् । 

असार १ गतेको बैठकमा सांसदहरुले मन्त्रालयमाथि विनियोजित विधेयकमाथिको छलफलका क्रममा सांसदहरुले उठाएका प्रश्नको जवाफ दिँदै मन्त्री श्रेष्ठले गरिबीका रेखामुनि परेका नागरिकलाई परिचय पत्र प्रदान गर्ने र भूमिहीन नागरिकलाई जग्गा धनी पूर्जा दिने काम तीव्र गतिमा भइरहेको जानकारी दिइन् ।

बैठकमा जवाफ दिँदा प्रश्न उठाउने सांसदहरुको नाम उच्चारण गरेर हरेकको प्रश्नको जवाफ दिएकी छन् । गुठी जग्गाको संरक्षण गर्न र जग्गाको कित्ताकाट गर्न सरकार प्रतिवद्ध रहेको बताएकी छन्् । सम्पूर्ण प्रश्नकर्ताको नामै उच्चारण गरेर तिनले उठाएका प्रश्नको जवाफ दिने तरिका विल्कुलै भिन्न बनेको छ । जवाफ दिने पहिलो चरण सकिएको छ । 

सांसद आश्माकुमारी चौधरीले आफू सुकुम्वासी रहेको र आफूले जग्गाधनी पूर्जा कहिले पाउँछु भन्दै मन्त्री श्रेष्ठलाई पूरक प्रश्न गरेकी छन् । अहिले यसअघिका बैठकमा प्रश्न उठाउने सांसदहरुले पूरक प्रश्न गर्ने चरण जारी छ ।

लालबहादुर सावाँ लिम्बू, प्रेम सुवाल देवेन्द्र पौडेल महेन्द्रबहादुर शाही, प्रेम सुवाल, आश्माकुमारी चौधरी, शान्ति चौधरी, अमरबहादुर रायमाझी, बलराम अधिकारी, सरस्वती सुब्बा, मानवीर राइ, बिना लामा, श्यामकुमार घिमिरे लगायत तीन दर्जनभन्दा बढी सांसदहरुको प्रश्नको जवाफ दिएकी छन् । 

अन्य सबै मन्त्रीहरुले आफ्नो मन्त्रालयमाथिको बजेटमा सांसदहरुले उठाएका प्रत्येक प्रश्नमा केहीको नाम लिएर एकमुष्ट जवाफ दिने गरेका पाइन्छ । त्यसमा धेरै प्रश्न छुट्ने र सांसदहरुले ‘मेरो प्रश्नको जवाफ आएन’ भन्दै गुनासो गर्ने गरेका छन् । मन्त्रीहरुले पनि सबैको चित्त बुझाउन नसकिने प्रतिक्रिया दिने गरेका छन् ।