निर्वाचन आयोगका पूर्व आयुक्त सुधीरकुमार शाह पक्राउ

१२ असार, काठमाडौं । नेपाल प्रहरीको केन्द्रीय अनुसन्धान ब्यूरोले निर्वाचन आयोगका पूर्व आयुक्त सुधीरकुमार शाह ललितानिवास जग्गा हिनामिना प्रकरणमा पक्राउ परेका छन् । यसअघि आजै ब्यूरोले ललितानिवास जग्गा हिनामिना प्रकरणका ५ आरोपीलाई पक्राउ गरेको थियो । 

मंगलबार भाटभटेनी सुपरमार्केटका सञ्चालक मीनबहादुर गुरुङलाई पक्राउ गरेको केही समय पछि नै थप चार जनालाई पक्राउन गरेको थियो । ब्यूरोले शाहलाई काठमाडौंबाट मंगलबार पक्राउ गरेको हो । ब्यूरो प्रमुख एआईजी किरण बज्राचार्यले अनुसन्धानका क्रममा शाहलाई नियन्त्रणमा लिइएको बताइन् ।

शाह सरकारी सेवामा रहँदा शक्तिको दुरुपयोग गरी ललिता निवासको जग्गा व्यक्तिको नाममा लैजाने काममा संलग्न रहेको अनुसन्धानबाट खुलेपछि पक्राउ परेको प्रहरीले जनाएको छ । 

व्युरोले मालपोत कार्यालय, डिल्लीबजारका तत्कालीन प्रमुख कलाधर देउजा, कर्मचारी सुरेन्द्रमान कपाली, धर्मप्रसाद गौतम र हुपेन्द्रमणि केसीलाई काठमाडौंका विभिन्न ठाउँबाट पक्राउ गरेको थियो ।  २०४९ सालदेखि २०६६ सम्म उनीहरूले मालपोत कार्यालय र भूमि सुधार तथा व्यवस्था विभागमा काम गरेका थिए ।