अदालतले स्टे अर्डर दिएपनि ब्यूरोबाट समातिए ललितानिवास प्रकरणमा मुछिएका तीन आरोपी

१२ असार, काठमाडौं । जिल्ला अदालत काठमाडौंले तत्काल पक्राउ नगर्नु भन्दै स्टे अर्डर दिएपनि नेपाल प्रहरीको केन्द्रीय अनुसन्धान व्युरो सीआईबीले ललितानिवासको जग्गा हिनामिना प्रकरणमा मुछिएका तीन आरोपीलाई मंगलबार पक्राउ गरेको छ । पक्राउ परेका उनीहरूसँग अदालतले स्टे अर्डर जारी गरेको पत्र थियो । 

सीआईबीले पक्राउ गरेका मालपोत कार्यालय डिल्लीबजारका तत्कालीन प्रमुख कलाधर देउजा, सुरेन्द्रमान कपाली र हुपेन्द्रमणि केसीले अदालतबाट पक्राउ नगर्नु, नगराउनु भन्ने आदेश लिएर बसेको अवस्थामा समातिएको व्युरोले जनाएको छ । 

कपाली र केसी पनि मालपोत कार्यालय डिल्लीबजारका तत्कालीन सरकारी अधिकारी हुन् । उनीहरूलाई बुधबार म्याद थप्ने गर्ने तयारी व्युरोले गरेको छ । सरकारी लिखत किर्ते गरेर बालुवाटार स्थित ललितानिवासको जग्गा हिनामिना गरेको कसुरमा सीआईबीले मीनबहादुर गुरुङ सहित ७ जनालाई पक्राउ गरेको छ ।