सरकारी सुरक्षा घेराभित्र रहेका अख्तियारका पूर्वप्रमुख आयुक्त दीप बस्न्यात सम्पर्कविहिन

१२ असार, काठमाडौं । प्रहरीको केन्द्रीय अनुसन्धान ब्यूरो (सीआईबी) ले ललितानिवास जग्गा प्रकरणको फाइल अगाडि बढाएर अनुसन्धान सुरु गरेपछि यो जग्गा हिनामिना प्रकरणमा मुछिएका अख्तियार दुरुपयोग अनुसन्धान आयोगका पूर्व प्रमुख आयुक्त दीपकुमार बस्न्यात सम्पर्कविहिन भएका छन् । उनी सुरक्षा घेरालाई छलेर भागेको बताइएको छ ।  

सीआईबीले मंगलबारदेखि सम्बन्धित व्यक्तिहरूलाई पक्राउ गर्दै अनुसन्धान अघि बढाएको छ । ब्यूरोले भाटभटेनी सुपरमार्केटका सञ्चालक मीनबहादुर गुरुङसहित छ जनालाई पक्राउ गरिसकेको छ । बस्न्यात मंगलबार रातीदेखि फरार भएको बताइएको छ । 

बालुवाटारको सरकारी जग्गा हिनामिनामा मुछिएको ठहर गर्दै अख्तियारले भ्रष्टाचारी ठहर गरेको, सम्पत्ति शुद्धीकरण विभाग र सीआईबीले अनुसन्धान गरिरहेका बस्न्यातलाई सरकारले छुट्टै सुरक्षाकर्मी खटाएको छ । उनको सुरक्षाको लागि सशस्त्रका ५ प्रहरी परिचालन गरिएको छ भने व्यक्तिगत सुरक्षाका लागि नेपाल प्रहरी समेत खटाएको छ ।

सुरक्षाकर्मीको घेरामा रहेका बस्न्यात कसरी सम्पर्कविहिन भएका हुन् । प्रहरीकै सामुन्ने राज्यका विशिष्ट पदाधिकारी फरार हुनुले विशिष्ट व्यक्तिको सुरक्षा माथिसमेत प्रश्न उठेकाे छ । उनी विरुद्ध अख्तियार दुरुपयोग अनुसन्धान आयोगले ९ करोड ६५ लाख रूपैयाँ बिगो माग राखी २०७६ माघ २२ गते मुद्दा दायर गरेको थियो । ललिता निवास प्रकरणमा अख्तियारले उनीसँगै १ सय ७५ जना विरुद्ध मुद्दा दायर गरेको थियो ।