सोरुमा सिटामोलसहित औषधिको चरम अभाव

♦ खड्क सुनार 

१४ असार, मुगु । मुगुको उत्तरी भेगमा पर्ने सोरु गाउँपालिका मातहातका स्वास्थ्य चौकीहरूमा सामान्य औषधि सिटामोलसमेत पाउन मुस्किल भएको छ । पालिकाका खनाया स्वास्थ्य चौकी, जिमा स्वास्थ्य चौकी, भिई, नाथर्प, बुम्चलगायत स्वास्थ्य चौकीहरुमा सिटामोलसहित औषधिको चरम अभाव देखिएको हो ।

गाउँपालिकामा आठ वटा आधारभूत स्वास्थ्य केन्द्र, चार वटा सामुदायि स्वास्थ्य  र तीनवटा इकाई रहेका छन् । पछिल्लो समय यी स्वास्थ्य चौकीहरूमा औषधि मुस्किलले पाउने गरेको छ । उपचार गर्न आएका बिरामीलाई एक चक्की सिटामोलसमेत पाउन गाह्रो अवस्था छ । स्वास्थ्य चौकी जिमाका ईन्चार्ज कर्णबहादुर सावतका अनुसार अहिले सामान्य सिटामोल पनि पाउनै गाह्रो भएको बताए ।

उनका अनुसार जिल्लामा सञ्चालित एक गैरसरकारी संस्था फेज नेपालले केही रुपमा औषधि सहयोग गरेको बताए । पछिल्लो समय स्वास्थ्य चौकीमा दैनिक २० देखि ५० जनासम्म बिरामी उपचार गर्न आउने गरेका छन् । तर, उनीहरू औषधि नपाई घर फर्किन बाध्य भएका छन् । 

उक्त स्वास्थ्य चौकीमा उपचार गर्न सिप, जिमा, गिलाहा बुम्च गाउँका बिरामीहरू आउने गरेका छन् ।   ‘न त पालिकाले औषधि दिन्छ,  न त जिल्ला स्वास्थ्यबाट नै आउँछ,’ उनले भने । 

औषधिको लागि जिल्ला स्वास्थ्य कार्यालय र पालिका स्वास्थ्य शाखामा औषधिको माग फारम पेस गर्दै हैरान भएको स्वास्थ्य चौकी जिमाका ईन्चार्ज कर्णबहादुर सावतले बताए । स्वास्थ्य चौकीमा ९८ प्रकारको औषधि हुनुपर्नेमा १० किसिमको औषधि पनि पाउनै मुस्किल भएको छ । यता सोरु गाउपालिकाका उपाध्यक्ष केशरबहादुर शाहीका अनुसार माग फारमका आधारमा  औषधि उपलब्ध गराउने नियम रहेको बताए ।  

पालिकाले औषधि खरिदमा पर्याप्त बजेट नछुट्याउने र जिल्ला स्वास्थ्य कार्यालयले औषधि उपलब्ध नगराउँदा दुर्गम बस्तीका स्वास्थ्य केन्द्रमा औषधिको चरम अभाव हुने गरेको छ । दुई चार दिनभित्रै औषधि नभएका स्वास्थ्य केन्द्रमा औषधि पठाइने सोरु गाउँपालिकाका स्वास्थ्य संयोजक चरित्र धामीले बताए । जिल्ला स्वास्थ्य कार्यालयबाट आएको औषधि र पालिकाले खरिद गरेको औषधि पठाइने उनको भनाइ छ ।