आलु र प्याज आयातमा भ्याट हटदैन, अनुदान दिएर आत्मनिर्भर बनाइन्छ : अर्थमन्त्री महत

१३ असार, काठमाडौं । अर्थमन्त्री डा. प्रकाशशरण महतले आयात गरिने आलु र प्याजमा भ्याट लाग्ने स्पष्ट पारे्का छन् । प्रतिनिधिसभाको आजको बैठकमा सांसदहरुले ‘आर्थिक विनियोजन विधेयक २०८०’ माथि उठाएका प्रश्नको जवाफ दिँदै मन्त्री डा. महतले विदेशमा खरिद गरिने प्याज र आलुमा लगाएको मूल्य अभिवृद्धि कर (भ्याट) लगाउने निर्णयबाट सरकारले पछि नहटने स्पष्ट पारेका छन् । 

आयातमा कर लगाउँदा देशभित्रका आलु र प्याज उत्पादन गर्दै आएका किसानले खुशी व्यक्त गरेको बताए । किसानलाई हातमा अनुदान दिएर आलु र प्याजमा आत्मनिर्भर बनाइछाड्ने प्रतिवद्धता व्यक्त गरे । यस्तै विदेशबाट ल्याइने फ्रोजन मासुमा कर लगाएको पनि स्पष्ट पारे । साथै स्वदेशमा उत्पादन हुने मासुमा कर नलगाइएको उनले स्पष्ट पारे ।

यस्तै उनले सुर्तीमा भइरहेको करमा थप गरिएको बताए । आयातित मदिरामा पनि कर बढाएको बताए । मदिरामा ‘लक्जरी कर’ लगाएको र यसका लक्षित वर्ग फाइभस्टर होटलहरु रहेको बताए ।

उनले ३५/४० लाख रुपैयाँ विद्युतीय गाडी चट्ने व्यक्ति गरिब हुन नसक्ने भन्दै क्षमताअनुसार विद्युतीय (ईभी)मा कर तोकेको बताए ।