नेकपाले असार १५ लाई ‘श्रम उत्सव’को रुपमा मनाउने

१४ असार, काठमाडौं । नेत्रविक्रम चन्द ‘विप्लव’ नेतृत्वको नेपाल कम्युनिस्ट पार्टीले पार्टी (नेकपा)ले असार १५ गते मनाइने धान दिवसलाई ‘श्रम उत्सव’को रुपमा मनाउने भएको छ ।

भोलि असार १५ गते सरकारले धान दिवसको रुपमा मनाउँदै आएको छ । किसानमाझ वर्षभरि खाना पुग्ने र मानो लगानी गरेर मुरी उब्जाउने मान्यता पाएको यस दिवसलाई नेकपाले श्रमको उच्च मूल्यांकन र झरी‚बादलबीच कृषकहरुले धान, कोदो बिरुवा लगाउन हामफाल्ने मुख्य समयको रुपमा लिँदै ‘श्रम दिवस’ मनाउने भएको हो ।

नेकपाले आर्थिक नीतिअन्तर्गत ‘आत्मनिर्भर उत्पादन, आत्मनिर्भर पार्टी’ नीति अगाडि सार्दै कडाई साथ लागू गर्ने महासचिव विप्लवले बुधबार सामाजिक संजालमार्फत सन्देश सार्वजनिक गरेका थिए ।

श्रम दिवसले मुलुकलाई आत्मनिर्भर बनाउन सहयोग प्रयाउने उद्देश्यसाथ भोलि शुक्रबार ७७ वटै जिल्लामा श्रम उत्सव मनाउने निर्णय भएको नेकपाले जनाएको छ । नेकपा महासचिव विप्लवले पार्टी केन्द्रीय कार्यालय रहेको कपिलको शिवगढीमा हुने धान रोपाइँमा सहभागी हुने जनाइएको छ । 

सोही नीति अनुरुप असार १० गतेदेखि असार ३० गतेसम्म पार्टीका नेता कार्यकर्ताहरुलाई उत्पादनका काममा खट्न बिदा दिने निर्णय गरेको छ । हालसम्म केन्द्रले ४० बिगाहमा उत्पादन गरिरहेको र जिल्ला, क्षेत्र, र जबससमेत गरी १०० बिगाहमा उत्पादन गरिरहेको जानकारी पनि विप्लवले सामाजिक संजालमार्फत दिएका छन् ।

प्रवक्ता प्रकाण्डले चितवन, स्थायी समिति सदस्य रणविर बर्दियामा हुने रोपाइँमा सहभागी हुने नेकपाले जनाएको छ । तराई यी क्षेत्रहरु धान उत्पादनका मुख्य केन्द्र मानिन्छ । रोपाईँ क्षेत्रमा पार्टीका सांस्कृतिक टोली सामना साँस्कृतिक परिवारले प्रस्तुति दिने र रोपाइँको रेडियो, टेलिभिजन, सामाजिक संजालबाट प्रत्यक्ष प्रसारण गरिने समेत जनाइएको छ ।

रोपाइँका लागि आज देशैभरका रोपाइँ हुने केन्द्रहरुमा पार्टीका नेता तथा कार्यकर्ताहरु किसानसँगै बिऊ उखेल्ने र जम्मा गर्ने काम खटिइसकेको जनाएको छ ।

नेकपाको उपत्यका विशेषब्यूराले गत हप्ता ललितपुर खुमलटारमा धान रोपाइँको आयोजनाा गरेको थियो ।

यो पनि पढ्नुहोस