विश्वासको मत नदिए मध्यावधि निर्वाचनकाे सामनाका लागि तयार हुन विपक्षीलाई कोशीका मुख्यमन्त्रीको चेतावनी

१४ असार, विराटनगर । कोशी प्रदेशका मुख्यमन्त्री हिक्मतकुमार कार्कीले आफूलाई सबै प्रदेशसभाले विश्वासको मत नदिए मध्यावधि निर्वाचनमा जाने चेतावनी दिएका छन् । 

बिहीबार प्रदेशसभामा विश्वासको मत माग्दै उनले आफूलाई विश्वासको मत नदिए अर्को सरकार पनि बन्न नसक्ने र मध्यावधिमा जाने बताए । उनले आफूले विश्वासको मत नपाए नयाँ सरकार बन्न नदिने चेतावनी दिए । एमालेबाहेकका दलको नेतृत्वमा सरकार बन्न नदिने आशयसाथ उनले विपक्षी दलहरुसँग मध्यावधिमा जान तयार रहे नरहेबारे प्रश्न गरे । 

‘यो बाटोमा नजाने हो भने मध्यावधि निर्वाचनको सामना गर्नुपर्छ, के मध्यावधि निर्वाचनमा जान हामी तयार छौं, यो प्रदेशसभा तयार छ, नेपालको संघीयता तयार छ ?’ उनको प्रश्न थियो । आफ्नो नेतृत्वको सरकारलाई विश्वासको मत नदिने कारण नै नभएको जिकिर समेत गरे । उनले बैठकमा अध्यादेश पेस गरेका छन् । 

माओवादी केन्द्र, एकीकृत समाजवादी र जसपाको समर्थनमा गएको पुषमा मुख्य बनेका कार्की तीन वटै दलले गएको जेठमा फरकफरक मितिमा समर्थन फिर्ता लिएपछि अल्पमतमा परेका थिए । त्यसबिचमा उनले प्रदेश सरकारको आर्थिक वर्ष २०८०/८१ का लागि नीति तथा कार्यक्रम र वार्षिक बजेट अध्यादेशबाट ल्याइसकेका छन् । 

सोही अध्यादेशलाई उनले पारितका लागि आज बैठकमा पेस गरेका हुन् । ९३ सदस्य रहेको प्रदेशसभाका सरकार बनाउन कम्तीमा ४७ मत आवश्यक पर्छ । कार्कीसँग हाल ४६ मत छन् । विपक्षमा रहेका दलहरुसँग सभामुखसहित ४७ मत छन् । तर एक मत रहेका विपक्षी जसपाले भने आजै मात्र कुनै पक्षमा भोट नहाली तटस्थ बस्ने निर्णय गरेको छ । योसँगै नयाँ सरकार गठनका लागि तम्सिएका कांग्रेस र माओवादी केन्द्रसँग एकीकृत समाजवादीसहित सभामुखको मत गन्दा ४६ मात्र पुग्ने अवस्था छ ।

विपक्षी दल कांग्रेस, माओवादी केन्द्र, एकीकृत समाजवादी र जसपाले भने कार्कीलाई विश्वासको मत नदिने निर्णइ गरिसकेका छन् ।

यस्तो अवस्था आजको बैठकमा बनेको खण्डमा संविधानअनुसार प्रदेशसभाको पहिलो ठूलो दलको हैसियतले एमालेले नै सरकारको बनाउने मोका प्राप्त गर्नेछ । यसनिम्ति प्रदेश प्रमुखबाट आह्वान हुनुपर्ने हुन्छ । यसरी बन्ने सरकार मुख्यमन्त्रीले नियुक्ति भएको ३० दिनभित्र प्रदेशसभामा विश्वासको मत लिनुपर्ने बाध्यता रहन्छ । त्योबेला पनि विश्वासको मत लिन नसके प्रदेशसभा सदस्यमध्ये कुनैले विश्वास मत लिन सकिने आधारसहित प्रदेश प्रमुखसमक्ष मुख्यमन्त्रीमा नियुक्तिका लागि निवेदन दिने बाटो खुल्छ ।

उनले पनि तोकिएको समयभित्र विश्वासको मत प्राप्त गर्न नसके प्रदेशसभा मध्यावधि निर्वाचनमा जानुको विकल्प रहँदैन । तर कार्कीको आजको अभिव्यक्तिले आज उनले विश्वासको मत पाउन नसके ठूलो दल एमालेकै नेतृत्वमा सरकार बन्ने र त्यही सरकारले मध्यावधिका लागि प्रदेश प्रमुखसमक्ष सिफारिस गर्नसक्ने संकेत गरेको छ । 

यद्यपि, उनी आज विश्वासको मत लिन असफल भएमा उनी स्वतः पदमुक्त हुनेछन् र नयाँ सरकार गठनका लागि प्रदेश प्रमुखबाट समयसमीमासहित आह्वान हुनेछन् । तर बहुमतीय वा ठूलो दलको हैसियतमा सरकार गठनका लागि आह्वान हुन्छ त्यो हेर्न केही घण्टा कुर्नैपर्ने भएको छ ।

यो पनि पढ्नुहोस