राजीनामा दिन मुख्यमन्त्री कार्कीलाई कांग्रेस नेता थापाको आग्रह

१४ असार, काठमाडौं । नेपाली कांग्रेसको कोशी प्रदेश संसदीय दलका नेता उद्धव थापाले मुख्यमन्त्री हिक्मतकुमार कार्कीलाई पदबाट राजीनामा आर्गह गरेका छन् । प्रदेशसभाको बिहीबार जारी बैठकमा मुख्यमन्त्री कार्कीले राखेका विश्वासको मत लिने प्रस्तावमाथि नेता थापाले दलको तर्फबाट धारणा राख्दै राजीनामा दिएर नयाँ सरकार गठनका लागि बाटो खुला गरिदिन आग्रह गरेका हुन् । 

थापाले विश्वासको मत संभावना नरहेको भन्दै कार्कीलाई राजीनामा सुझाव दिए । बैठकमा माओवादी केन्द्रका संसदीय दलका नेता आइन्द्र आङबोले विश्वासको मत नदिने बताएका छन् । यस्तै एकीकृत समाजवादीका संसदीय दलका नेता राजेन्द्र राईले पनि कार्कीलाई आफ्नो दलले मत नदिने स्पष्ट पारेका छन् । एक मत रहेको जसपाले भने प्रस्तावको पक्ष वा विपक्ष कतैपनि मत नहाली तटस्थ बस्ने निर्णय गरेको छ ।

एमालेका कार्की नेतृत्वको सरकार ढालेर आफ्नै नेतृत्वमा सरकार गर्ने योजनासाथ कांग्रेस र माओवादी केन्द्र लागिरहेका छन् । प्रदेशमा सरकार गठन गर्न ४७ मत आवश्यक पर्छ । तर, जसपा तटस्थ बस्ने निर्णयसँगै कार्की पक्ष र विपक्षी गठबन्धन ४६/४६ मत बराबरको धरातलमा पुग्ने अवस्था छ । यस्तो अवस्थामा नयाँ सरकार गठनका लागि प्रदेशसभाको पहिलो ठूलो दलका हैसियत एमालेले नै सरकार गठनको मौका पाउने संभावना रहेको अड्कलबाजी भइरहेको छ । यसरी सरकार गठन भएमा त्यस सरकारका मुख्यमन्त्रीले नियुक्त भएको ३० दिनभित्र विश्वासको मत लिन प्रदेशसभामै पुग्नेपर्ने व्यवस्था छ ।

तर आजको बैठकमा विश्वासको मत प्रसताव गर्दैगर्दा मुख्यमन्त्री कार्कीले आफूलाई विश्वासको मत नदिए मध्यावधि निर्वाचनको सामना गर्न तयार रहन विपक्षी गठबन्धन दललाई चुनौति दिएका छन् । प्रदेशमा जम्मा ९३ सदस्य छन् ।