मुख्यमन्त्री कार्कीले विश्वासकाे मत पाएनन्, एमाले कोशी प्रदेशबाट पनि आउट

१५ असार, काठमाडौं । एमाले नेतृत्वको कोशी प्रदेश सरकार ढलेको छ । तत्कालीन सत्ता समीकरणमा एमालेबाट मुख्यमन्त्री बनेका हिक्मतकुमार कार्कीले अल्पमतमा परेपछि प्रदेश सभा बैठकमा विश्वासको मत लिने प्रस्तावमाथि शुक्रबार भएको मतदानमा विश्वास मत पाउन असफल भएपछि उनी नेतृत्वको सरकार ढलेको हो । 

८९ सदस्य सहभागी भएका आजको बैठकमा कार्कीको प्रस्तावको पक्षमा ४६ मत मात्र परेको छ । विपक्षमा ४३ मत परेको छ । प्रदेशसभामा कूल सदस्य संख्या ९३ (सभामुखसहित) छन् । एक सदस्य रहेकाे जसपा प्रस्तावमा तटस्थ बसेकाे छ ।

गएका पुष २४ मा माओवादी केन्द्र र जसपाको समर्थन मुख्यमन्त्री बनेका कार्की ६ महिना नपुग्दै पदच्युत भएका छन् । उनकाे पद जाेगिन ४७ मत आवश्यक पर्छ ।  पदच्युत भएसँगै नयाँ सरकार गठको ढोका खुलेको छ ।

एमाले केन्द्र सरकार र प्रदेशहरू गण्डकी, लुम्बिनी, सुदूरपश्चिम प्रदेशबाट यसअघि नै आउट भइसकेको छ ।

गत ४ मंसिरमा भएको संघ र प्रदेश निर्वाचनपछि बनेको पहिलो समिकरणमा संघ र प्रदेशमा सरकारमा पुगेको एमाले अब पूर्णरुपले दुवै तहमा प्रतिपक्षमा पुगेको छ ।