रावा इनर्जी र मोदी इनर्जीको शेयर कारोबार सुरु

२० असार, काठमाडौं । नेपाल स्टक एक्सचेन्ज (नेप्से )मा रावा इनर्जी डेभलपमेन्ट र मोदी इनर्जीको शेयर कारोबार सुरु भएको छ । बुधबार स्पेसल प्रि-ओपन सेसनमा रावा इनजीको पहिलो कारोबार प्रति कित्ता २४९.३० रूपैयाँमा खुला भएको हो । सोही भाउलाई आधार मानेर यसको नियमित कारोबार हुनेछ । 

रावाको चुक्ता पुँजीका आधारमा कायम कुल २८ लाख कित्ता सेयर मंगलबार सूचीकृत भएको थियो । नेप्सेले यसको ओपनिङ रेन्ज प्रतिकित्ता ८३.१० रूपैयाँदेखि २४९.३० रूपैयाँसम्म तोकेको थियो । सोही रेन्जको अधिकतम विन्दुबाट कारोबार सुरु भएको हो । ‘आरएडब्लुए’ संकेतमा यसको सेयर कारोबार सुरु भएको छ । 

यता, मोदी इनर्जीको पहिलो कारोबार प्रति कित्ता २७० रूपैयाँमा खुला भएको छ । सोही भाउलाई आधार मानेर नियमित कारोबार पनि हुनेछ । यसको चुक्ता पुँजीका आधारमा कायम २ करोड ९० लाख कित्ता शेयर मंगलबार सूचीकृत भएको हो । यसको ओपनिङ रेन्ज प्रति कित्ता ९२.५७ रूपैयाँदेखि २७७.७१ रूपैयाँ तोकिएको थियो । ‘एमइएल’ संकेतमा शेयर कारोबार सुरु भएको छ ।