कांग्रेस नेतृत्वको कार्यशैली र व्यवहारप्रति जिल्ला सभापतिहरु असन्तुष्ट, रूपान्तरणको स्पष्ट खाका ल्याउन माग

२१ असार, काठमाडौं । नेपाली कांग्रेसका जिल्ला सभापतिहरूले पार्टी नेतृत्वको कार्यशैली र व्यवहारप्रति असन्तुष्टि देखाएका छन् । कांग्रेस पार्टी कार्यालय सानेपामा आजबाट सुरु भएको नयाँ सदस्यता वितरणसम्बन्धी अभिमुखीकरण कार्यक्रममा सहभागी हुन आएका ७७ वटै जिल्लाका सभापतिहरूले नेतृत्वको कार्यशैलीको आलोचना गरेका छन् ।  

खास गरी पार्टी सभापति शेरबहादुर देउवा र महामन्त्री द्वय विश्वप्रकाश शर्मा र गगन थापाको व्यवहार र कार्यशैलीलाई लिएर सभापतिहरूले असन्तुष्टि पोखेका छन् । सभापतिहरूले महामन्त्रीद्वयले रुपान्तरणको कुरा पटक पटक उठाएको तर, रुपान्तरण पार्टीको, गुटको वा व्यक्तिको भन्ने कुरामा आफूहरू अल्मलिएको बताएका छन् ।  

कांग्रेस महामन्त्री द्वय विश्वप्रकाश शर्मा र गगन थापाप्रति लक्षित गर्दै सभापतिहरूले पार्टीको रुपान्तरणबारे स्पष्ट खाका ल्याउन नसक्नु कमजोरी भएको बताएका छन् । बिहीबारबाट पार्टी केन्द्रीय कार्यालय सानेपामा सुरु भएको छलफलमा जिल्ला सभापतिहरूले पार्टीको रुपान्तरण प्रक्रियाको खाका स्पष्ट पार्न नेतृत्वलाई आग्रह गरे । 

प्रतिनिधिसभा सदस्यसमेत रहेका संखुवासभा जिल्ला सभापति दीपक खड्काले पार्टीको रुपान्तरणबारे स्पष्ट पार्न माग गरे । भेलामा उनले भने, अहिले रुपान्तरणको कुरा उठिरहेको छ, गुटको रुपान्तरण हो कि पार्टीकै ? यसमा कस–कसलाई समेट्ने हो । उनले कांग्रेस सरकारमा भए पनि नागरिकले अनुभूति गर्न नसकेको समेत बताए । पार्टी सरकारमा भए पनि समन्वय हुन नसकेको उनको भनाइ छ ।

त्यस्तै युवा तथा खेलकुद मन्त्रीसमेत रहेका मोरङ जिल्ला सभापति डिगबहादुर लिम्बूले अर्थमन्त्री प्रकाश शरण महतले आफ्नै क्षेत्रमा बजेट केन्द्रित गरेको गुनासो गरे । मन्त्री लिम्बूले आफैंले पनि मन्त्रालयमा पर्याप्त बजेट नपाएको समेत बताए । प्रतिनिधिसभा सदस्यसमेत रहेका रामेछाप जिल्ला सभापति पूर्णबहादुर तामाङ (कान्छाराम) ले पनि सरकार र पार्टीबीच समन्वय हुन नसकेको बताए । 

सभापतिहरूले पार्टीका गतिविधिहरू शिथिल हुन थालेको भन्दै पार्टी नेतृत्वको ध्यानाकर्षण गराए । सभापतिहरूले पार्टीलाई पुनः जागरण गर्न विशेष कार्यक्रम ल्याउनुपर्ने बताएको कांग्रेस प्रचार विभाग प्रमुख मीन विश्वकर्माले जानकारी दिए । उनले सरकारमा मन्त्री रहेका सभापतिहरूले आफूले सरकारमा भोगिरहेको अप्ठ्याराहरूको बारेमा कुरा राखेका र सरकारमा नभएका जिल्ला सभापतिहरूले भने सरकारसँग आफूहरूको कुनै समन्वय नभएको गुनासो राखेका बताए ।

भेलामा मन्त्री नै रहेका पार्टी सभापतिहरूले मन्त्रीलाई परेका अप्ठ्याराका बारेमा धारण राखेका थिए भने मन्त्री नरहेका पार्टी सभापतिहरूले सरकारसँगको समन्वय नभएको गुनासो राखेका थिए । सँगसँगै पार्टी सभापतिहरूले पार्टीका कार्यक्रमहरूमा केही शिथिलताहरू हुन थालेको बताए । आसन्न केन्द्रीय समितिको बैठकले त्यस विषयमा पनि दरिलो ढंगबाट छलफल गरोस् भन्ने उनीहरुको भनाइ थियो । गहिरो ढंगबाट यसलाई छलफल गरोस्, विश्लेषण गरोस् र पार्टीलाई पुनर्ताजगी गर्नका लागि विशेष कार्यक्रम ल्याओस् भन्ने पार्टी सभापतिहरूले धारणा राखेका थिए । 

जिल्ला सभापतिहरूको बैठकमा क्रियाशील सदस्यता र कांग्रेस सदस्यताको वितरण, नवीकरण र अभिलेखीकरणको विषय एजेन्डा रहेको छ । त्यस्तै, पार्टीले विधानबमोजिम गर्नुपर्ने पार्टीका विभिन्न तहका सम्मेलनका विषय र पार्टी सञ्चालन तथा व्यवस्थापनलगायतका अन्य विविध सांगठनिक विषय बैठकको एजेन्डा रहेको छ ।