प्रतिनिधिसभा बैठक सूचना टाँसेर स्थगित गर्ने तयारी

२२ असार, काठमाडौं । आज ३ बजेका लागि बोलाइएको प्रतिनिधिसभाको बैठक अझै सुरु हुन सकेको छैन । प्रधानमन्त्री प्रचण्डले दिएको भारतपरस्त अभिव्यक्तिलाई लिएर प्रमुख प्रतिपक्षी एमालेले बैठक चल्न नदिने अडान राखेपछि बैठक सुचारु गराउन सभामुख देवराज घिमिरेले कार्य व्यवस्था समितिको बैठक राखेका छन् । 
बैठकमा सहमति जुट नसकेको बताइएको छ । यसकारण सभामुखको निर्देशनमा संसद सचिवालय सूचना टाँस गरेर बैठक आइतबारसम्मका लागि स्थगित गर्ने तयारी भइरहेको स्रोतको भनाइ छ । 

सभामुखले बैठकमा दलहरुबीच भोलि शनिबारसम्म बैठक चल्ने वातावरण बनाउन सहमति कायम गर्न समय दिने बताएको स्रोतले बतायो । सभामुख समितिका अध्यक्ष रहने व्यवस्था छ । सदनमा दलहरुबीच विवाद पर्दा समितिमा छलफल गराई सहमति जुटाउने प्रयास गरिन्छ । 

प्रधानमन्त्रीको अभिव्यक्तिलाई लिएर प्रधानमन्त्री प्रचण्डले राजीनामा नदिएसम्म सदन चल्न नदिने अडानसाथ यसअघि २ वटा बैठक अवरुद्ध पारिसकेको छ । आज बसेको राष्ट्रियसभाको बैठकलाई एमालेले चल्न नदिएपछि आगामी आइतबारसम्मका लागि स्थगित भएको  ।

गत सोमबार काठमाडौंमा भारतीय मुलका नागरिक सरदार प्रितम सिंहको जीवनीमा लेखिएको पुस्तक विमोचन कार्यक्रममा प्रधानमन्त्री प्रचण्डले आफूलाई कुनै बेला प्रधानमन्त्री बनाउन सिंह भारतको नयाँदिल्ली पटकपटक धाएको आशयका अभिव्यक्ति दिएका थिए ।

यो पनि पढ्नुहोस