भ्रष्टाचार प्रकरणमा एमाले नेताहरु नचलाउने सर्तमा प्रधानमन्त्री प्रचण्ड र ओलीबीच संसद खुलाउने सहमति

२४ असार, काठमाडौं । आफूलाई भ्रष्टाचार विरोधी नेताको रुपमा उभ्याउँदै आएका नेकपा एमालेका अध्यक्ष केपी शर्मा ओलीले कुनै पनि भ्रष्टाचार प्रकरणमा एमालेका नेताहरूलाई नचलाउने सर्तमा संसद चल्न दिने सहमति गरेका छन् । आज बिहान भएको छलफलमा अध्यक्ष ओलीसँग भ्रष्टाचारमा संलग्न एमाले नेतालाई नचलाउने सर्तमा संसद खोल्न दिने र प्रधानमन्त्रीको राजीनामाबाट पछि हट्ने सहमति भएको हो ।

एमालेले लगातार चार दिनदेखि संसद अवरोध गर्दै आएको एमालेले संसद नखोल्ने अडान लिएपछि आइतबार बिहान प्रधानमनत्री पुष्पकमल दाहाल, नेपाली कांग्रेसका सभापति शेरबहादुर देउवा र एमाले अध्यक्ष ओलीबीच संसद अवरोध हटाउने विषयमा छलफल भएको थियो । छलफलमा यस्तो सहमति भएको प्रधानमन्त्री प्रचण्ड निकट स्रोतको दावी छ ।  

भ्रष्टाचार प्रकरणमा एमाले नेता नचलाउने विषयमा प्रधानमन्त्री पनि सहमति भएका छन् । उनले यसमा प्रतिबद्धता जनाएपछि प्रमुख प्रतिपक्षी दल एमाले विवादास्पद अभिव्यक्तिबारे प्रधानमन्त्री संसदमा स्पष्ट पार्ने गरी जोडतोडका रुपमा उठाउँदै आएको राजीनामाको विषयबाट पछि हट्न सहमत भएको हो । यसपछि आइतबार बोलाइएको प्रतिनिधिसभाको बैठक सूचना टाँसेर सोमबारका लागि सारिएको छ । 

आइतबार दिउँसो १ बजेका लागि बोलाइएको प्रतिनिधिसभाको बैठक विशेष कारणवश सोमबार अपरान्ह ३ बजे बस्ने गरी सारिएको संघीय संसद सचिवालयका महासचिव डा. भरतराज गौतमले जारी गरेको सूचनामा उल्लेख छ ।  

यसअघि  प्रधानमन्त्री पुष्पकमल दाहाल प्रचण्डको आग्रहमा सभामुख देवराज घिमिरेले आइतबार दिउँसो १ बजेका लागि बोलाइएको संसद बैठक दुई घण्टा पछि सारेका थिए । एक पुस्तक विमोचन कार्यक्रममा प्रधानमन्त्री प्रचण्डले आफूलाई प्रधानमन्त्री बनाउन सरदार प्रितम सिंह धेरै पटक भारत गएको विवादास्पद अभिव्यक्ति दिएका थिए । यसले संसदको अपमान गरेको भन्दै एमालेले प्रधानमन्त्रीको राजीनामा माग गर्दै संसद अवरुद्ध गर्दै आएको छ ।

एमालेले संसद अवरुद्ध गर्दा मिटरब्याजीलाई अनुचित लेनदेनका रुपमा कानुनी परिभाषित गरी दण्डनीय हुने गरी मौजुदा कानुनमा संशोधन गर्न सरकारले ल्याएको अध्यादेश निष्क्रिय भएको छ भने मिटरब्याज पीडितहरू फेरि संघर्षमा उत्रिएका छन् । आइतबार उनीहरूले मिटरब्याजीलाई कारबाही गर्ने गरी कानुन ल्याउन माग गर्दै प्रदर्शनसमेत गरेका छन् ।