प्रतिनिधिसभा बैठक बस्दै, मिटरब्याजसम्बन्धी प्रतिस्थापन विधेयक अगाडि बढाइने

३१ असार, काठमाडौं । प्रतिनिधिसभा बैठक बस्दैछ । दिउँसो १ः०० बजे बैठक बोलाइएको छ । संघीय संसद सचिवालयले सार्वजनिक गरेको कार्यसुची अनुसार आजको बैठकमा कानुन, न्याय तथा संसदीय मामिला मन्त्री धनराज गुरुङले ‘केही नेपाल ऐन संशोधन गर्न बनेको विद्येयक २०८०’ लाई प्रस्तुत गर्नेछन् ।

उनले सो प्रस्तावमाथिको संशाेधनहरुलाई निर्णायार्थ प्रस्तुत गर्ने देखी पारित गरियोस् भन्ने प्रस्तावसमेत प्रस्तुत गर्ने सम्भावित कार्यसुचीमा उल्लेख गरिएको छ ।  

अध्यादेश निष्क्रिय भएर प्रतिनिधिसभामा अलपत्र मिटरब्याज सम्बन्धी प्रतिस्थापन विधेयक अगाडि बढाउन सत्तारूढ दलहरू सहमत भएकाले आज पास हुने भनिएको छ । आइतबार प्रतिनिधिसभामा दफावार छलफल सकेर त्यसै दिन पारित गर्ने सत्तारूढ दलहरूको तयारी छ । तर, विधेयक अगाडि बढाउन तयार रहे पनि विपक्षी दलहरूले प्रक्रियाको विषयमा छलफल गर्नुपर्ने बताएका छन् । 

संसद् सचिवालयले मुलुकी संहितासम्बन्धी केही नेपाल ऐनलाई संशोधन गर्ने विधेयक प्रतिनिधिसभाको आइतबार बस्ने बैठकको सम्भावित कार्यसूचीमा राखेको छ । दफावार छलफल सकेर मिटरब्याज सम्बन्धी कानुन बनाउन विधेयक आइतबार नै पारित गर्ने तयारी छ । विधेयकमा १४ वटा संशोधन प्रस्ताव दर्ता भएको छ । 

उपप्रधान तथा गृहमन्त्री नारायणकाजी श्रेष्ठ, कानुनमन्त्री धनराज गुरुङ र सत्तापक्षीय प्रमुख सचेतकहरूबीच शनिबार गृह मन्त्रालयमा भएको छलफलमा विधेयकको विषयवस्तुमा सहमति जुटेको छ ।

यस्तै शिक्षा विज्ञान तथा प्रविधि मन्त्री अशोककुमार राईले राष्ट्रिय सभामा उत्पति भएको ‘नेपाल विश्वविद्यालय विद्येयक २०८०’ माथि विचार गरियोस् भन्ने प्रस्ताव प्रस्तुत गर्ने कार्यसुचीमा उल्लेख गरिएको छ ।