ललितानिवास जग्गा प्रकरण : व्यापारी र बस्नेतको खोजीमा सीआईबीको टोली भारत पुग्याे

३ साउन, काठमाडौं । बालुवाटारस्थित ललिता निवास जग्गा हिनामिना प्रकरणमा मुछिएका केही व्यापारी र पूर्व अख्तियार प्रमुख दीप बस्नेत फरार भएपछि प्रहरीको एउटा टोली भारत पुगेको छ । बालुवाटार जग्गासँग सम्बन्धित रहेका व्यापारीहरू अहिले मोबाइल स्वीच अफ गरेर भारततर्फ फरार भएपछि उनीहरूको निगरानीका लागि भारतीय प्रहरीसँग समन्वय गरेर नेपाल प्रहरीको टोली भारत पुगेको हो । 

अख्तियार दुरुपयोग अनुसन्धान आयोगका पूर्व आयुक्त दीप बस्न्यातले देश छाडेर दिल्लीमा रहेका छन् । बस्न्यातमाथि सरकारको सचिव हुँदा ललिता निवास प्रकरणमा भूमिका खेलेको आरोप छ । अर्का आरोपी शोभाकान्त ढकालकी पत्नी उमा ढकाल पनि फरार छिन् ।

सारडा ग्रुपका अध्यक्ष शिवरतन सारडा र उनका छोरा सन्दीपकुमारविरुद्ध पक्राउ पूर्जी जारी भएको थियो । पक्राउ पूर्जी जारीपछि भएसँगै शिवका बाबुछोरा तथा दाजुभाइ श्रीनिवास सारडा, राधेश्याम सारडा र पवनकुमार सारडा सम्पर्कविहीन छन् । यस प्रकरणमा मोरङ व्यापार संघ र उद्योग परिसंघ कोशी प्रदेशले विज्ञप्ति निकालेर सरकारले गरिरहेको अनुसन्धानबाट उद्योगी व्यवसायी हतोत्साहित हुनु परिरहेको बताएका छन् । अनुसन्धानका नाममा धरपकड भइरहेको उनीहरूको आरोप रहेको छ । 

राज्यसँग भएको रेकर्ड र स्रेस्ताका आधारमा कारोबार गरेको तथा सरकारी निकाय साक्षी राखेर सरकारले नै प्रमाणित गरिदिएको जग्गाको कारोबारमा कैफियत देखिँदा किन्ने मान्छे कसरी दोषी हुन्छ उनीहरूको बचाउ गर्ने कोसिस भइरहेको छ । सारडा परिवारभित्र कान्छो भाइ पवन संविधानसभा सदस्य तथा मोरङ व्यापार संघका पूर्व अध्यक्ष समेत हुन् । शिव रतन जेठो, श्री निवास माइलो र राधेश्याम साइँला भाइ हुन् ।

ललिता निवास प्रकरणमा सीआईबीले २०७७ मा विस्तृत अनुसन्धान गरी १४३ रोपनी जग्गा हिनामिना भएको भन्दै ४ सय जनाविरुद्ध मुद्दा चलाउनुपर्ने निष्कर्ष निकालेको थियो । सरकारले सुवर्ण शमशेर र उनका आफन्तको नाममा रहेको जग्गा मुआब्जा लिएर २४ जेठ २०२२ मा अधिग्रहण गरेको थियो । तर, २०४९ सालमा राजकाज मुद्दा लागेपछि निर्वासनमा गएका सुवर्ण शमशेरको १२ रोपनी जग्गामात्र राष्ट्रियकरण गरिएकोमा सबै राष्ट्रियकरण गरिएको देखाएर २०४९ मा जग्गाका भोगाधिकारीले आफ्ना नाममा पारेको पत्ता लागेको थियो ।

त्यसपछि २०४९, २०६२, २०६६, २०६७ र २०६९ मा किर्ते गरी जग्गा व्यक्तिको नाममा लगिएको अनुसन्धानबाट खुलेको थियो । प्रहरीले उनीहरू बसेको स्थान पत्ता लगाउनका लागि भारतीय प्रहरीसँग समन्वय गरिरहेको स्रोतको दावी छ ।  

प्रकरणमा अदालतले असार १५ गते पक्राउ पुर्जी जारी गर्नुअघि उनी असार १२ गते नयाँ दिल्ली गएका भनिएपनि केही दिन अघि काठमाडौं आएर विशेष अदालतबाट म्याद बुझेर दिल्ली गएका थिए । बस्नेत निकटहरुले उनी उपचारको लागि त्यता गएको बताउँदै आएका छन् ।  ललिता निवास प्रकरणमा हालसम्म १८ जना पक्राउ परिसकेका छन् ।