‘ब्रेक शु’मा आएको सुन तस्करीमा विमानस्थल प्रहरी र भन्सारको मिलेमतो रहेको आशंका

३ साउन, काठमाडौं । त्रिभुवन अन्तर्राष्ट्रिय विमानस्थल भन्सार कार्यालय र प्रहरीको मिलेमतोबाट बाहिरिएको सुन मंगलबार साँझ राजश्व अनुसन्धान विभागले बरामद गर्न सफल भएको छ । तीन महिना अघि खुलेको एक कम्पनीको नामबाट ल्याइएको सुनलाई चिनियाँ, नेपाली र भारतीय व्यापारीको मिलेमतोमा भारततर्फ लैजान लागिएको सुनलाई मंगलबार बेलुकी पख विभागको टोलीले बरामद गरेको हो ।

मोटरसाइकल र स्कुटरको ‘ब्रेक शु’ भनेर ल्याएको सामानमा टासेर सुन ल्याइएको थियो । विभाग स्रोतका अनुसार करिब ९० देखि १०० किलो सुन नेपाल ल्याइएको हो  । ‘ब्रेक शुको तौल चाहि करिब १ सय ५२ किलो भन्दा बढी छ’, स्रोतले भन्यो । विभागले मंगलबार साँझ होल्ड गरेको र बुधबार दिउँसोबाट अप्रेशन शुरु गरेको थियो । त्यो अप्रेशन राती अबेरसम्म चलेको थियो । सो  अप्रेशनबाट ठूलो परिणाम सुन बरामद भएको हो । चिनबाट हङकङ हुँदै नेपाल आएको थियो । 

विभागका महानिर्देशक नवराज ढुंगानाका अनुसार मंगलबारबाटै अप्रेशन सुरु भएको र बुधबार राती अबेरसम्म नै जारी रहेको थियो । ‘क्याथे प्यासिफिक’को प्लाइटमार्फत आएको उक्त सुन कार्गोमा थियो । मोटरसाइकल र स्कुटरको ब्रेक सुमा राखेर सुन नेपाल ल्याइएको थियो । ८० किलोभन्दा माथि होला हामी अझै अप्रेशनमै छौ’, महानिर्देशक ढुंगानाले नेपालबहससँगको कुराकानीमा भने । विभागको विशेष सूचनाका आधारमा टोलीले विमानस्थल भन्सारमा छापा मारेको थियो ।

सुनसँगै दुई जना व्यक्तिलाई पनि पक्राउ गरिएको छ । एक जना भन्सार एजेण्ट राजेन्द्र राई र  ट्याक्सी चालक ​​​​​लाई प्रहरीले नियन्त्रणमा लिएको छ । तीन महिनाअघि खोलिएको कम्पनीको नाममा पटक पटक यस प्रकारको सामान आउने सूचना प्रहरी र विमानस्थल भन्सार कार्यालयलाई पनि थियो । तर उनीहरूले वेवास्ता गरेपछि मंगलबार साँझ विभागका कर्मचारीहरू आफै गएर विमानस्थल बाहिरबाट बरामद गरेका थिए । 

स्रोतका अनुसार सुराकीको आधारमा विभागका कर्मचारीहरूले सामान जाँचपास गरेर भन्सार हाताबाट बाहिर ल्याउँदै गरेको अवस्थामा विमानस्थल गेट बाहिरबाट एक भन्सार एजेन्ट र ट्याक्सी चालकसहित सुन बरामद गरेपछि मात्रै विमानस्थल प्रहरी र भन्सारका कर्मचारीलाई जानकारी दिइएको थियो ।

अनुसन्धान विभागका एक कर्मचारीका अनुसार स्कुटरको पार्टसँगै जोडेर ल्याएका कारण परिणाम अझै एकिन हुन सकिरहेको छैन । ‘स्कुटर पार्टमा सुन पनि जोडेर ल्याएको छ, त्यसको तौल यकिन हुन सकेको छैन’, स्रोतले भन्यो । सुन तस्करीको वास्तविक मालिक भने पक्राउ परेका छैनन् । 

विभागलाई बुधबार बिहानैबाट सुराकी आएको र आगमन कक्षबाट सुन बाहिरिएको अवस्थामा बरामद भएको स्रोतले जनाएको छ । एक्सरे मेसिनमा पनि सुनजस्तो वस्तु नदेखिएको तर सुराकीले स्कुटरको पार्टमा सुन राखेर ल्याएको सुराकी दिएपछि विभागका कर्मचारी मंगलबार नै भन्सार कार्यालयमा पुगेका थिए । स्रोतका अनुसार नेपाली व्यापारीहरू मध्यस्थकर्ता र चिनियाँ र भारतीय व्यापारीको मिलेमतोमा यो सुन तस्करी हुने क्रममा थियो । विभागले नेपाली व्यापारीहरूलाई पनि निगरानीका राखेको स्रोतले जनाएको छ ।

यो पनि पढ्नुहोस