तौल गरिएको सुन बबरमहलस्थित राष्ट्र बैंक मातहतको टक्सार महाशाखाको ढुकुटीमा राखियो

४ साउन, काठमाडौं । राजश्व अनुसन्धान विभागले बरामद गरेको सुनसहितका स्कुटरका ब्रेक शुको तौल नेपाल राष्ट्र बैंकको टक्सार विभागले जोखेर भ्याएको छ । सुनसहितको ब्रेक शुको तौल १ सय ५५ किलो भएको छ भने सुन मात्रै निकालेर तौल गरिँदै छ । बुधबार बरामद गरिएको सुन काठमाडौंको बबरमहलस्थित नेपाल राष्ट्र बैंकको मुद्रण व्यवस्थापन विभाग मातहतको टक्सार महाशाखाको ढुकुटीमा राखिएको हाे । 

बिहीबार मुचुल्का उठाएर सुन ढुकुटीमा राखिएको हो । ती ब्रेक सु जोख्दा कुल तौल १ सय ५५ किलो आएको राजश्व अनुसन्धान विभागले जानकारी दिएको छ । कुल एक सय ६० वटा ब्रेक सु फेला परेको थियो, तीमध्ये एउटा बाहेक सबैमा सुन रहेको पाइएको छ । अब ती ब्रेक सुबाट सुन निकालेर जोखिने छ । ब्रेक शु भित्र सुनका साना साना टुक्रा भएकाले सबै निकालेर जोख्न समय भएको छ । 

जोख्न लगिएको सुन राजश्व अनुसन्धान विभागको टोलीले टक्सार महाशाखालाई जिम्मा लगाएर फर्किएको छ । यसपछि सुनलाई ढुकुटीमा राखिएको महाशाखाका निर्देशक थानेश्वर आचार्यले जानकारी दिए । उनले भने ढुकुटीमा सुन राख्यौँ’ भनेर टोली फर्किएको बताए । राजश्वको टोलीले थप केही नभनेसम्म सुन ढुकुटीमै रहनेछ ।

रेडी ट्रेड लिंक बूढानीलकण्ठका नाममा हङकङबाट सो सुन ल्याइएको थियो । विभागकै टोलीले सुन बरामद गरेको थियो । विमानस्थलको भन्सार जाँचपास भएर ट्याक्सीमा लैजान लागिएको अवस्थामा सुन बरामद गरिएको थियो । सो प्रकरणमा हालसम्म ६ जना पक्राउ परेका छन् ।