शुक्रबारदेखि चन्द्रागिरीमा उपसभामुखसँग दुवै तहका सभा सञ्चालनबारे सभामुख र अध्यक्ष छलफलमा

६ साउन, काठमाडौं । संसदीय समस्याका  विषयमा शनिबारदेखि सातै प्रदेशका सभामुख र उपसभामुखसँग काठमाडौँको चन्द्रागिरीमा संघीय संसदका सभामुख देवराज घिमिरे र राष्ट्रिय सभाका अध्यक्ष गणेशप्रसाद तिमिल्सिनाले छलफल गरिरहेका छन् । शुक्रबारदेखि सुरु भएको संघीय संसद र प्रदेश सभाको अनुभव आदान प्रदान एवं अन्तरक्रिया कार्यक्रम शनिबार पनि जारी छ ।
 
शनिबार सबै प्रदेशका सभामुख, उपसभामुख र प्रदेश सभा सचिवले आफ्नो अनुभवसहित धारणा राखिरहेका छन् ।  सभामुख घिमिरेका प्रेस सल्लाहकार शेखर अधिकारीका अनुसार दोस्रो दिनको कार्यशाला सुरु गर्दै सभामुख देवराज घिमिरेले दुवै तहका सभाबीच भएको कार्यक्रमले सभा सञ्चालनका लागि सहयोग पुग्ने विश्वास व्यक्त गरेका छन् । 

 सभामुख घिमिरेले कानुनको अडिट गर्ने फोरमको आवश्यकतामा जोड दिएका छन् । उनले नेपालमा संसदीय अध्ययन अनुसन्धानको अभ्यास कम भएको बताउँदै आगामी दिनमा सुधार गर्दै लैजानुपर्ने बताएका छन् ।  २०७५ साल भदौ ३ गते चन्द्रागिरिबाटै संघीय संसद र प्रदेश सभाको अनुभव आदान प्रदान सुरु भएको थियो । अहिलेसम्म यस्तै प्रकृतिका ६ वटा कार्यक्रम विभिन्न प्रदेशमा भएका छन् ।