रेडी ट्रेडर्सको गोदाममा राजश्वको छापा, ६६ बाकस ‘ब्रेक शु’ बरामद

१० साउन, काठमाडौं । दोलखाका एक जना गरिब केटोलाई मोहोरा बनाएर कृत्रिम कम्पनी खडा गरी सुन तस्करीमा प्रयोग गरिएको रेडी ट्रेडर्स प्रालिको सोह्रखुट्टे स्थित गोदाममा राजश्व अनुसन्धान विभागले छापा मारेको छ ।

आज बिहान विभागको टोलीले काठमाडौं महानगरपालिका १६ स्थित सोर्‍हखुट्टेको एक घरमा छापा मारेको हो । हङकङबाट सुन मगाउने कम्पनी ‘रेडी ट्रेड प्रालि’को सो गोदामबाट राजश्वका अधिकारीहरूले ब्रेक शु बरामद गरेका छन् ।

छापामारीमा संलग्न एक अधिकृतका अनुसार गोदामबाट ठूलो परिमाणमा ‘ब्रेक शु’ बरामद भएको छ । ती वस्तुमा सुन छ अरू नै भन्ने बारेमा यकिन भइसकेको छैन । तर मोटरसाइकल र स्कुटरमा लाग्ने ६६ बाकस ब्रेक शु बरामद गरिएको अनुसन्धानमा संलग्न एकजना अधिकृतले नेपालबहसलाई बताए । पहिलेदेखि नै सुन तस्करले सो गोदाममा सुन ल्याएर निकाल्ने र ‘रि–प्याक’ हुने गरेको अनुसन्धानमा संलग्न अधिकारीहरूको दावी छ ।

एक क्विन्टल सुन पक्राउ गर्नु अघि २२ पटक आयात भएको ठूलो परिमाणको ‘ब्रेक शु’ बरामद भएको छ,’ विभाग स्रोतले नेपालबहससँग भन्यो ।