नारायणी नदीमा शिक्षक बेपत्ता, खोजीमा गोताखोर झिकाइँदै

१९ साउन, काठमाडौं । नारायणी नदीमा बगेर एक शिक्षक बेपत्ता भएका छन् । देवघाटस्थित नारायणीमा अस्तु सेलाउन गएका दाङको तुलसीपुर उपमहानगरपालिका–१२ कौवापुरका ३२ वर्षीय लोकेन्द्र भुसाल आज बिहान बगेर बेपत्ता भएका हुन् । 

उनी सवारी दुर्घटनामा परी दृत्यु भएका मामाका छोरा रेमन्त बस्नेतको अस्तु सेलाउन देवघाट गएका थिए । रेमन्तको शव बिहीबार मात्र दाङको बबई घाटमा अन्त्येष्टि गरिएको थियो । लोकेन्द्र जाजरकोटस्थित चौरजहारीको एक विद्यालयमा पढाउने गर्थे ।

नदीमा बेपत्ता लोकेन्द्रको खोजी भइरहेको इलाका प्रहरी कार्यालय देवघाटले जनाएको छ । नदी किनारमा उनको पर्स, मोवाइल, कपडा फेला परेका छन् । उनी नुहाउने क्रममा नदीले बगाएको अनुमान गरिएको छ । त्रिशूली र कालीगण्डकी मिसिने दोभानबाट उनलाई बगाएको पाइएको छ । खोजीका लागि गोताखोर झिकाउने कोशिस भइरहेको प्रहरीले जनाएको छ ।