७० अर्बभन्दा माथि पुग्यो वाणिज्य बैंकहरूको मुनाफा, नविलपछि ग्लोबल आईएमईले कमायो सवा ७ अर्ब

२१ साउन, काठमाडौं । बाणिज्य बैंकहरुले वित्तीय विवरण सार्वजनिक गरेका छन् । देशका २० वटै वाणिज्य बैंकले गएको आर्थिक वर्षको अपरिष्कृत वित्तीय विवरण सार्वजनिक गर्दा नाफा बढेको देखिएको छ । बैंकहरूले सार्वजनिक गरेका चौथो त्रैमाससम्मको अपरिष्कृत वित्तीय विवरणानुसार २० वाणिज्य बैंकले ७० अर्ब १७ करोड ५८ लाख रुपैयाँ नाफा आर्जन गरेका छन् ।

अघिल्लो आर्थिक वर्षको तुलनामा यी बैंकको नाफा औसत २४.९५ प्रतिशतले वृद्धि भएको छ । आर्थिक वर्ष २०७८ र ७९ को अन्त्यसम्म यी बैंकहरूले ५६ अर्ब १७ करोड २३ लाख रुपैयाँ नाफा आर्जन गरेका थिए ।

वित्तीय विवरणानुसार गएको वर्ष सर्वाधिक नाफा कमाउने र वृद्धि गर्नेमा नबिल बैंक अगाडि छ । यो बैंकले उक्त अवधिमा सात अर्ब ५२ करोड ७१ लाख रुपैयाँ नफा आर्जन गरेको छ । अघिल्लो वर्ष यो बैंकले चार अर्ब २५ करोड ६० लख रुपैयाँ आर्जन गरेको थियो । अघिल्लो वर्षको तुलनामा यो बैंकको नाफा ७६.८६ प्रतिशले वृद्धि भएको हो ।

बढी नाफा गर्नेमा दोस्रोमा ग्लोबल आइएमई बैंक लिमिटेड छ । यो बैंकले सात अर्ब २५ करोड ३४ लाख रुपैयाँ नाफा आर्जन गरेको छ । तर, अघिल्लो वर्षको तुलनामा यो बैंकको नाफा ४६ प्रतिशतले मात्र वृद्धि भएको छ । प्रतिशतको हिसाबमा सर्वाधिक नाफा वृद्धि गनर्मो दोस्रोमा स्ट्यान्डर्ड चार्टर्ड बैंक छ । यो बैंकले ५६।२७ प्रतिशतले नाफा वृद्धि गरेको छ । यो बैंकले तीन अर्ब ५२ करोड रुपैयाँ नाफा गरेको छ । 
 

 ​​​​​बैंकको खुद ब्याज आम्दानी ६६ प्रतिशतले बढेर १७ अर्ब ११ करोड रूपैयाँ नाघेको छ । बैंकको निक्षेप ५४ प्रतिशतले बढ्दा ऋण ३८ प्रतिशतले बढेको छ । बैंकको निक्षेप ४ खर्ब २६ अर्ब पुगेको छ भने ऋण ३ खर्ब ५६ अर्ब रूपैयाँ पुगेको छ । बैंकक खराब ऋण १.२८ प्रतिशतबाट बढेर ३.०८ प्रतिशत पुगेको छ ।
 
यस्तै गएको आर्थिक वर्ष २०७९/८० को अन्त्यसम्ममा हिमालयन बैंकको मुनाफा बढेको छ । बैंकले आइतबार सार्वजनिक गरेको चौथो त्रैमाससम्मको अपरिष्कृत वित्तीय विवरणअनुसार अघिल्लो वर्षको सोही अवधिको तुलनामा मुनाफा ३७.९६ प्रतिशतले बढेको हो । गएको आर्थिक वर्षको असार मसान्तसम्ममा बैंकले तीन अर्ब २६ करोड ६१ लाख रूपैयाँ खुद मुनाफा कमाएको छ । अघिल्लो आर्थिक वर्षको सोही अवधिमा बैंकले दुई अर्ब ३६ करोड ७५ लाख रूपैयाँ खुद नाफा कमाएको थियो ।

खुद ब्याज आम्दानी तथा सञ्चालन मुनाफा उलेख्य मात्रामा बढेकाले मुनाफा वृद्धिमा सहयोग पुगेको देखिन्छ । बैंकको खुद ब्याज आम्दानी १००.९५ प्रतिशत बढेको छ । खुद फी तथा कमिसन आम्दानी ५.४४ प्रतिशतले बढेको छ । बैंकले गएको वर्ष ९ अर्ब ९३ करोड ३४ लाख रुपैयाँ खुद ब्याज आम्दानी गरेको छ । खुद फी तथा कमिसनबाट बैंकले ९६ करोड ३३ लाख रूपैयाँ आर्जन गरेको छ । बैंकलाई उक्त अवधिमा पाँच अर्ब ४९ करोड ११ लाख रूपैयाँ सञ्चालन मुनाफा भएको छ ।

गएको आर्थिक वर्षको अन्त्यसम्ममा बैंकको वितरणयोग्य मुनाफा भने ७१ करोड १४ लाख रूपैयाँ ऋणात्मक छ । अघिल्लो वर्ष यस्तो मुनाफा दुई अर्ब ५६ करोड ७७ लाख रूपैयाँ थियो । बैंकको निक्षेप ६३.४७ प्रतिशतले बढेको छ । कर्जा लगानी ५६.४२ प्रतिशतले बढेको छ । बैंकले असार मसान्तसम्म दुई खर्ब ७५ अर्ब ३१ करोड रूपैयाँ निक्षेप संकलन गरेको छ । दुई खर्ब ३० अर्ब १२ करोड रूपैयाँ कर्जा लगानी गरेको छ ।

बैंकको चुक्ता पुँजी २१ अर्ब ६५ करोड ६६ लाख रूपैयाँ छ । बैंकले जगेडा कोषमा १४ अर्ब ९१ करोड ४८ लाख रूपैयाँ सञ्चित गरेको छ । बैंकको खराब कर्जा ४.५७ प्रतिशत कायम भएको छ । अघिल्लो वर्ष यस्तो खराब कर्जा १.५९ प्रतिशत थियो । यो बैंकको प्रतिशेयर आम्दानी १९ रूपैयाँ १९ पैसा छ । प्रतिशेयर नेटवर्थ १६५ रूपैयाँ ५८ पैसा छ ।
 
यसैगरी लक्ष्मी सनराइज बैंकको मुनाफा ४९.४५ प्रतिशतले वृद्धि भएको छ । गएको आर्थिक वर्षमा बैंकले दुई अर्ब २६ करोड १८ लाख रूपैयाँ मुनाफा आर्जन गरेको छ । आइतबार सार्वजनिक वित्तीय विवरणअनुसार अघिल्लो आर्थिक वर्षको सोही अवधिमा बैंकले एक अर्ब ५१ करोड ३४ लाख रूपैयाँ खुद मुनाफा कमाएको थियो ।

लक्ष्मी बैंक र सनराइज बैंक १ः१ सेयर स्वाप रेसियोमा एकापसमा मर्जरमा भएका हुन् । मर्जरपछि बैंकको यो पहिलो वित्तीय विवरण हो । बैंकले गएको वर्ष पाँच अर्ब ५० करोड ७१ लाख रूपैयाँ खुद ब्याज आम्दानी गरेको छ । खुद फी तथा कमिसनबाट बैंकले ९९ करोड ६ लाख रूपैयाँ आर्जन गरेको छ । बैंकलाई उक्त अवधिमा तीन अर्ब ४२ करोड २७ लाख रूपैयाँ सञ्चालन मुनाफा भएको छ । बैंकले असार मसान्तसम्म दुई खर्ब ९६ अर्ब २४ करोड रूपैयाँ निक्षेप संकलन गरेको छ । दुई खर्ब ५३ अर्ब ६९ करोड रूपैयाँ कर्जा लगानी गरेको छ ।

बैंकको चुक्ता पुँजी २१ अर्ब ६७ करोड दुई लाख ३८ हजार रूपैयाँ छ । बैंकले जगेडा कोषमा १४ अर्ब पाँच लाख रूपैयाँ सञ्चित गरेको छ । गएको आर्थिक वर्षको अन्त्यसम्म बैंकको वितरण योग्य मुनाफा एक अर्ब ९३ करोड ७१ लाख रूपैयाँ छ । अघिल्लो वर्षको तुलनामा बैंकको वितरणयोग्य मुनाफा वृद्धि भए पनि लाभांश क्षमता घटेको छ । अघिल्लो वर्ष १०.४० प्रतिशत लाभांश क्षमता थियो । यो वर्ष बैंकको लाभांश क्षमता ८.९४ प्रतिशत मात्र छ ।

बैंकको खराब कर्जा २.८१ प्रतिशत कायम भएको छ । अघिल्लो वर्ष खराब कर्जा ०.८९ प्रतिशत थियो । बैंकको प्रतिशेयर आम्दानी १९ रूपैयाँ ४४ पैसा छ । प्रतिशेयर नेटवर्थ १७३ रूपैयाँ ५५ पैसा छ । 

यस्तै मेगा बैंक नेपाललाई गाभ्दा त्यहाँ बिग्रिएको ऋणका कारण मर्जरपछि बनेको नेपाल इन्भेस्टमेन्ट मेगा बैंकको नाफा र नोक्सान हिसाब खाता केही खराब देखिएको छ । खुदा मुनाफामा केही सुधार देखिए पनि वितरणयोग्य मुनाफा उल्लेख्य घटेको छ । खराब ऋण अनुपात पनि बढेको छ ।

अघिल्लो वर्ष निकै राम्रो प्रदर्शन गरेको नेपाल इन्भेस्टमेन्ट बैंकको हिसाबकिताब मेगा गाभेपछि खराब भएको वित्तीय विवरणमा देखिन्छ । बैंकको खुद मुनाफा ४ अर्ब २९ करोड रूपैयाँ पुगेको छ । मर्जरका कारण निक्षेप, ऋण, ब्याज आम्दानी सबै लगभग दोब्बरले बढेको छ । साथै खराब ऋण त्यो भन्दा बढीले वृद्धि भएको छ ।

खुद ब्याज आम्दानी १११ प्रतिशतले बढेर १२ अर्ब २७ करोड नाघेको छ । ऋण लगानी ९३ प्रतिशतले बढेर ३ खर्ब नाघेको छ । निक्षेप पनि ९२ प्रतिशतले बढेर साढे ३ खर्ब नाघेको छ । खराब ऋण डेढ प्रतिशतबाट बढेर ४.३५ प्रतिशत पुगेको छ । 
 
सिटिजन्स बैंकको आर्थिक वर्ष २०७९–८० को अपरिस्कृत वित्तीय विवरणअनुसार यो बैंकले २ अर्ब २१ करोड मुनाफा आर्जन गरेको छ । यो अघिल्लो आर्थिक वर्ष २०७८–७९ को तुलनामा १०.४१ प्रतिशत बढी हो । बैंकले अघिल्लो आर्थिक वर्षमा २ अर्ब ५६ करोड मुनाफा आर्जन गरेको थियो । बैंकको कुल सञ्चालन आम्दानी १०.७९ प्रतिशतले वृद्धि भई ६ अर्ब ९३ करोड पुगेको छ । 

बैंकको आम्दानीमा वृद्धि भए पनि सम्भावित कर्जा नोक्सानीबापतको व्यवस्थाका लागि ७३ करोड ३ लाख छुट्याएको छ । अघिल्लो आर्थिक वर्षमा ५५ करोड २५ लाख छुट्याइएको थियो । अघिल्लो आर्थिक वर्षको तुलनामा १३.४३ प्रतिशतले बढाएर गत आर्थिक वर्ष बैंकले ३ अर्ब ७ करोड सञ्चालन मुनाफा आर्जन गरेको हो । यो बैंकले अघिल्लो आर्थिक वर्षमा २ अर्ब ७० करोड सञ्चालन मुनाफा आर्जन गरेको थियो । गत असार मसान्तमा बैंकको निष्क्रिय कर्जा २।२२ प्रतिशतबाट बढेर ३.१९ प्रतिशत पुगेको छ ।

सानिमा बैंकको मुनाफामा उल्लेख्य सुधार भएको छ । बैंकले २५.१३ प्रतिशतले खुद मुनाफा बढाएको छ । यो बैंकको मुनाफा २ अर्ब ६१ करोड नाघेको छ । खुद ब्याज आम्दानी पनि ३९.५० प्रतिशतले बढेको छ । बैंकको खराब ऋण भने धेरै नै बढेको छ । अघिल्लो वर्ष ०.३३ प्रतिशत रहेको सानिमा बैंकको खराब ऋण यसपालि १.३० प्रतिशत पुगेको छ ।

बैंकको निक्षेपको तुलनामा ऋणको वृद्धि दर घटेको छ । तर, मुनाफामा उल्लेख्य सुधार छ । बैंकको ऋण साढे ६ प्रतिशतले बढेर एक खर्ब ४५ अर्ब रूपैयाँ पुगेको छ भने निक्षेप साढे ११ प्रतिशतले बढेर १ खर्ब ७५ अर्ब नाघेको छ । बैंकले स्प्रेड दर बढाएका कारण नाफामा सुधार भएको हो । ३.८६ प्रतिशतको स्प्रेड दर ४ प्रतिशत पुर्याएको छ ।

वाणिज्य बैँकहरू वित्तीय विवरण सार्वजनिक गर्ने क्रममै छन । वाणिज्य बैंक, विकास बैंक र वित्त कम्पनीहरूले २१ साउनभित्र गत आवको चौथो त्रैमासिक वित्तीय विवरण सार्वजनिक गर्नुपर्छ । अन्य सूचीकृत कम्पनीहरूले साउन मसान्तभित्र वित्तीय विवरण सार्वजनिक गर्न सक्छन् । 

गत आर्थिक वर्षको असार मसान्तसम्म नेपाल बैंकको नाफा १६.७० प्रतिशतले बढेर ३ अर्ब ४१ करोड रूपैयाँ पुगेको छ । अघिल्लो आवमा यो बैंकको मुनाफा २ अर्ब ९२ करोड थियो । बैंकको सञ्चालन नाफा २१.१९ प्रतिशतले बढेर ४ अर्ब ४० करोड पुगेको छ । असार मसान्तसम्म बैंकको वितरणयोग्य मुनाफा ९७ करोड ३३ लाख छ । १४ अर्ब ६९ करोड चुक्ता पुँजी रहेको नेपाल बैंकको जगेडा कोषमा २० अर्ब ९१ करोड छ । बैंकको खराब कर्जा १.८३ बाट २.८५ प्रतिशत पुगेको छ ।

यसै गरी गत वर्ष कृषि विकास बैंकको खुद मुनाफा ३९.२४ प्रतिशत बढेको छ । गत वर्ष बैंकले ३ अर्ब ९ करोड रुपैयाँ खुद मुनाफा कमाएको हो । अघिल्लो वर्षको यसै अवधिमा बैंकले २ अर्ब २२ करोड खुद मुनाफा गरेको थियो । एक वर्षमा बैंकले ८७ करोड ३५ लाख रूपैयाँ खुद नाफा बढाएको छ ।

बैंकले सार्वजनिक गरेको गत आर्थिक वर्षको चौथो त्रैमासको अपरिस्कृत वित्तीय विवरणअनुसार २ अर्ब रुपैयाँ वितरणयोग्य मुनाफा आर्जन गरेको छ । बैंकको चुक्ता पुँजी १३ अर्ब ४५ करोड छ । यो बैंकको खराब कर्जा अनुपात बढेर २.४८ प्रतिशत पुगेको छ ।

गत आर्थिक वर्षको असार मसान्तसम्म प्रभु बैंकको मुनाफा ४८.५४ प्रतिशतले बढेर २ अर्ब ८२ करोड पुगेको छ । अघिल्लो आवको यही अवधिमा बैंकको मुनाफा १ अर्ब ९० करोड थियो । बैंकको सञ्चालन मुनाफा ४७.५२ प्रतिशतले बढेर ४ अर्ब २० करोड पुगेको छ । बैंकको वितरणयोग्य मुनाफा भने १६ करोड १६ लाख छ । यो बैंकको खराब कर्जा १.८६ प्रतिशतबाट बढेर ४.१६ प्रतिशत पुगेको छ । यसका कारण लोन लस प्रोभिजनमा २ अर्ब ४३ करोड रूपैयाँभन्दा बढी रकम छुट्याउनु परेको छ ।

गत आवमा सिद्धार्थ बैंकको प्रोभिजन रकम बढ्दा ब्याज आम्दानीको अनुपातमा मुनाफा बढ्न सकेको छैन । व्यवसाय उल्लेख्य विस्तार नभए पनि बैंकले ब्याजदर अन्तरलाई व्यवस्थापन गर्दा खुद ब्याज आम्दानीमा भने वृद्धि भएको छ, जसले गर्दा प्रोभिजन बढ्दा पनि बैंकको मुनाफामा वृद्धि भने भएको छ ।

बैंकले गत आर्थिक वर्षमा ३ अर्ब १९ करोड खुद मुनाफा आर्जन गरेको छ । यो अघिल्लो आवको भन्दा ९.९१ प्रतिशत बढी हो । बैंकले अघिल्लो आर्थिक वर्षमा २ अर्ब ९० करोड मुनाफा आर्जन गरेको थियो । बैंकले गत आर्थिक वर्षमा बोनस शेयरमार्फत चुक्ता पुँजी १२.५ प्रतिशतले बढाएर १४ अर्ब ९ करोड पुर्याएको छ । चुक्ता पुँजी बढाउँदा पनि बैंकको मुनाफामा भएको वृद्धिले प्रतिशेयर आम्दानी अघिल्लो वर्ष २० रूपैयाँ ६० पैसा रहेकोमा गत आर्थिक वर्षमा २२ रूपैयाँ ४३ पैसा पुगेको छ । २०७९ असार मसान्तमा १.०७ प्रतिशत रहेको यो बैंकको निष्कृय कर्जा २०८० असार मसान्तमा बढेर २.०१ प्रतिशत पुगेको छ ।

यस्तै, माछापुच्छ्रे बैंकको निष्क्रिय कर्जा वृद्धि हुँदा सम्भावित कर्जा नोक्सानी बापतको प्रोभिजन रकम बढेको छ । यद्यपि आम्दानीमा भएको वृद्धिसँगै मुनाफा पनि बढेको छ । बैंकले गत आर्थिक वर्षमा १ अर्ब ८५ करोड मुनाफा कमाएको अपरिस्कृत वित्तीय विवरण सार्वजनिक गरेको छ । यो अघिल्लो आवको भन्दा ९.७५ प्रतिशत बढी हो । बैंकले आर्थिक वर्ष २०७८–७९ मा १ अर्ब ६८ करोड खुद मुनाफा आर्जन गरेको थियो ।