प्रशासकीय अधिकृतमाथि हातपात गरेकाे अभियाेगमा वडाध्यक्ष पक्राउ

२१ साउन, काठमाडौं । सिन्धुलीको गोलञ्जोर गाउँपालिकाका प्रमुख प्रशासकीय अधिकृत शम्भुप्रसाद पौडेललाई हातपात गरेको आरोपमा सोही गाउँपालिका वडा नं. ३ वडाध्यक्ष दौतलविक्रम कार्कीलाई प्रहरीले पक्राउ गरेको छ । 

गत असार १४ गते आयोजनाको विषयमा वडाध्यक्ष र प्रशासकीय अधिकृतबीच विवाद हुँदा कार्कीले पौडललाई हातपात गरेको आरोप छ । त्यसपछि पाैडेलले कार्कीविरूद्ध उजुरी दिएका थिए । तैपनि पक्राउ परेका थिएनन् ।

वडाअध्यक्ष कार्कीमाथि कारवाही गर्न जिल्लाका कर्मचारीहरुले माग गर्दै आइरहेका बेला उनलाई प्रहरीले आइतबार पक्राउ गरेको हो । कार्कीलाई अनुसन्धान गर्न जिल्ला अदालतबाट ५ दिनको म्याद पाएको प्रहरीले जनाएको छ । अभद्र व्यवहार कसुरमा अनुसन्धान हुने प्रहरीको भनाइ छ ।