भारी वर्षापछि बनेपाको पुलबजार क्षेत्र डुबानमा

२३ साउन, काठमाडौं । सोमबार साँझदेखि परेको भारी वर्षापछि आएको बाढीले काभ्रेको बनेपाको पुल बजार क्षेत्र पूरै डुबानमा परेको छ । पुल समेत डुब्दामा अरनिको राजमार्गमा सवारी आवगमनमा समस्या भएको बनेपा ट्राफिक कार्यालय बनेपाले जनाएको छ । 

यो क्षेत्र हरेक वर्ष वर्षातको समयमा डुबानमा पर्दै आएको छ । तापनि निकास दिनेबारे चासो नदिँदा यस वर्ष पनि डुबानको समस्या दोहोरिएको हो । डुबानले पुल वारि र पारि ५० मिटरसम्म डुबेको छ । केही घरका सटर समेत डुबेको छ । नाला खोलामा आएको बाढी पुल क्षेत्रमा पुग्दा साँघुरो बहावमा परिणत हुँदा डुबान भएको हो ।

स्थानीयले खोला मिचेर घर बनाउने र यसबाट बाढीले निकास नपाउँदा वरपरका क्षेत्र डुबानमा परेको स्थानीय बताएका छन् ।