कामका आधारमा मुल्यांकन हुने गरी प्रधानमन्त्री र मन्त्रीबीच कार्यसम्पादन सम्झौता, कार्यादेश पुरा गर्न निर्देशन

२५ साउन, काठमाडौं । प्रधानमन्त्री पुष्पकमल दाहाल 'प्रचण्ड' र मन्त्रिपरिषदका सदस्यबीच कार्यसम्पादन सम्झौता भएको छ । मासिक रुपमा मन्त्रालयगत कार्य प्रगतिको विवरण लिन प्रधानमन्त्रीले २१ मन्त्रीहरूसँग यो सम्झौता गरेका हुन् । अब सरकारले कार्यसम्पादन मूल्यांकनको आधारमा मन्त्रीहरूको कामको मासिक रिपोर्ट कार्ड बनाएर मुल्यांकन गर्नेछ । 

बिहीबार प्रधानमन्त्री तथा मन्त्रिपरिषदको कार्यालयमा प्रधानमन्त्री प्रचण्डले आर्थिक वर्ष २०८०/८१ को वार्षिक कार्यक्रम कार्यान्वयनका लागि मन्त्रीहरूसँग कार्यसम्पादन सम्झौता हस्ताक्षर गरेका हुन् । संझौताअनुसार संघीय सरकारका मन्त्रीले आफूले नेतृत्व गरेको मन्त्रालयले गर्ने कामको प्रगति मासिक रुपमा अनलाइन प्रणालीमार्फत प्रधानमन्त्रीलाई पठाउनुपर्नेछ र यसैका आधारमा मन्त्रीहरूको मुल्यांकन हुनेछ । 

कार्यसम्पादन सम्झौतामा हस्ताक्षरपछि प्रधानमन्त्री प्रचण्डले तोकिएको कार्यादेश र कार्य विवरणअनुसार प्रभावकारी काम गर्न मन्त्री र सचिवहरूलाई निर्देशन दिएका छन् । कार्यसम्पादनको नतिजा नै मन्त्रीहरूको चुनौतीपूर्ण र महत्वपूर्ण जिम्मेवारी दिने, जिम्मेवारीको निरन्तरता दिने, पुरस्कृत वा कारबाही गर्ने आधार हुने कुरा स्पष्ट हुने प्रधानमन्त्रीले बताएका छन् । 
 
सम्झौतापत्रमा हासिल गर्नुपर्ने नतिजा सूचक राखिएको छ, जसमा आर्थिक वर्ष २०७९/०८० को समग्र स्थिति र आर्थिक वर्ष २०८०÷०८१ को लक्ष्य निर्धारण गरिएको छ । सम्झौतापत्रमा गर्नुपर्ने प्रमुख कामहरू उल्लेख छ, जसमा कार्यक्रम र क्रियाकलापको सूची र सो जिम्मेवारी पूरा गर्नुपर्ने समय सीमा उल्लेख छ ।

सम्झौतामा कार्यसम्पादनको प्रगति मासिक रूपमा प्रधानमन्त्री कार्यालयमा अनलाइन प्रणालीबाट पठाउनुपर्ने र त्यसलाई मासिक तथा वार्षिक प्रतिवेदन र मूल्यांकनको आधार बनाइने उल्लेख छ । कार्यसम्पादन सम्झौताको अवधि १ वर्ष तोकिएको छ । सम्झौता अवधि भरमा मन्त्रीको पद रिक्त भएमा नयाँ नियुक्त हुने मन्त्रीले यस सम्झौता बमोजिमको बाँकी काम गर्नुपर्नेछ ।