मुख्यमन्त्री पहिचान पक्षधरसँग वार्ता गर्न मञ्जुर भएपछि जसपा कोशी सरकारमा जान तयार

२६ साउन, विराटनगर । जनता समाजवादी पार्टी कोशी प्रदेश सरकारमा सहभागी हुने भएको छ । उसले आजै पार्टीका एक्ला प्रदेश सांसद निर्मला लिम्बूलाई मन्त्रीमा सिफारिस गर्ने भएको छ । मन्त्रालयको टुंगो नलागे पनि लिम्बूलाई आजै प्रदेश प्रमुखबाट मन्त्रीमा शपथ खुवाउने तयारी गरेको छ । 

यसअघि जसपा पहिचान पक्षधरले कोशी प्रदेशको नाम पहिचानका आधारमा राख्नुपर्ने भन्दै किरात, राई, लिम्बू लगायत आदिवासी जनजातिहरुले सुरु गरेको आन्दोलनका क्रममा मन्त्री रहेकी लिम्बूलाई सार्वजनिक रुपमा आवतजावतमा समेट बाधा पुगेपछि आन्दोलनको दबाबमा परी एमाले नेतृत्वको सरकारका बेला राजीनामा दिएकी थिइन् । 

अहिले केन्द्र सरकारकै समिकरणअनुरुप नेपाली कांग्रेसका उद्वव थापाको नेतृत्वमा सरकार बनेपछि जसपा पुनः सरकारमा जान तयार भएको हो । मुख्यमन्त्री थापाले आजै मात्र पहिचान पक्षधरसँग वार्ता गर्न प्रदेश सरकार प्रतिवद्ध रहेको विज्ञप्ति जारी गरेका छन् । विज्ञप्तिमा थापाले आन्दोलनकारीको माग सम्बोधन गर्न आफू नेतृत्वको सरकार तयार रहेको प्रवितद्धता जनाएका छन् ।