देशमा के हुँदैछ र किन फरक ढंगका गतिविधि भइरहेका छन भन्ने कुरा कांग्रेसले बुझ्न ढिला भइसक्योः कोइराला

२८ साउन, काठमाडौं । नेपाली कांग्रेसका वरिष्ठ नेता डा. शेखर कोइरालाले नेपालमा असहज परिस्थिति उत्पन्न हुन लागको बताएका छन् । उनले देशमा एकपछि अर्को गर्दै भइरहेका फक ढंगका गतिविधिहरूले राम्रो सन्देश नभएको बताउँदै यसबारे नेपाली कांग्रेसले सोच्न ढिला भइरहेको बताएका छन् । कांग्रेस अग्रसर भएर यस्ता गतिविधिलाई नरोक्ने हो नेपाल अन्तर्राष्ट्रिय तस्करहरूको अखडा बन्ने उनको भनाइ छ ।

कांग्रेस संसदीय दलको आइतबार बसेको बैठकमा वरिष्ठ नेता कोइरालाले नेपाल अन्तर्राष्ट्रिय तस्करको अखडा बनिसकेको दाबी गर्दै सुन तस्करीको छानबिनका लागि उच्चस्तरीय छानबिन समिति नै गठन गर्नुपर्ने बताए । उनले एमालेले किन उच्चस्तरीय छानविन समिति गठनको माग गरिरहेको छ, हामी यसमा के सोचिरहेका छौ, अब समय घर्किने बेला भइसक्यो, त्यसैले कांग्रेस जागेर नयाँ निर्णयमा पुग्न जरुरी भइसकेको बताए ।

कांग्रेसको बलमा प्रधानमन्त्री रहिरहेका पुष्पकमल दाहाल प्रचण्डका भनाइ र गराइमा धेरै अन्तर आएको कांग्रेसले बुझ्न जरुरी रहेको कोइरालाको भनाइ छ ।  प्रधानमन्त्री प्रचण्डले पहिले राजश्व अनुसन्धान नै सक्षम छ भन्नु भयो, फेरी सीआईबीलाई दिनुभयो, समिति बनाउन मानिरहनु भएको छैन, उहाँ के चाहि रहनु भएको छ, हामी के बुझिरहेका छौ भन्दै उनले कांग्रेस सचेत नभए देश दुर्घटनामा जाने बताए । नेता कोइरालाले सुन तस्करीमा उच्चस्तरीय छानबिन समिति गठन गर्नुपर्ने बताए ।

भारतको उदाहरण दिँदै कोइरालाले भने, ‘१४०० टन सुन खपत हुने भारतमा ९०० टन मात्र आयात हुने गरेको तथ्याङ्क छ । ४०० देखि ५०० टन सुन नेपालबाट जाँदैछ भन्ने बुझ्न अब जरुरी छैन । प्रचण्डले सचिवालयमा काम गरेका व्यक्तिलाई नै राजश्व अनुसन्धान विभागमा गएपछि सुन समातिएको छ । त्यसपछिका घटनाहरू अप्रत्यासित देखिँदै आइरहेका छन् । 

उनले कांग्रेसको सहयोगमा प्रधानमन्त्री भएको व्यक्तिले प्रतिशोधको भावना राखेर कांग्रेसका नेतालाई अपहरणको शैलीमा पक्राउ गरेको कुरालाई कांग्रेस बुझ्न नसकिरहेको बताए । नेकपा एमालेले किन उच्चस्तरीय छानबिन समिति गठनको माग गरिरहेको छ भनेर कहिल्यै सोच्यौं हामीले भन्दै नेतृत्वलाई प्रश्न गर्दै नेपाललाई तस्करको अखडाबाट बन्द गर्न यो जरुरी रहेको बताए । 

कोइरालाले ल्यारक्याल लामाहरूको नियुक्तिले पार्टीको छवि कमजोर भइरहेको छ भन्ने मन्त्रीहरूले बुझ्नुपर्ने बताए । आदिवासी जनजाति दिवसमा प्रधानमन्त्री प्रचण्डले ‘माओवादीलाई भोट दिनुस्, जातीय राज्य दिन्छौं’ भनेको भन्दै उनले यसमा पार्टीले खेद प्रकट गर्नुपर्ने बताए । उनले यही अवस्थामा कांग्रेस रहन्छ कि नयाँ ढंगबाट अगाडि जान्छ भन्ने मुल्यांकन जनताले गरिरहेको बताए ।