एक क्वीन्टल भनिएको बरामद सुन गालेर तौलदा ६० किलो ७१६ ग्राम निस्कियो, गुणस्तर पहिचान हुन बाँकी

३० साउन, काठमाडौं । साउन २ मा त्रिभुवन अन्तर्राष्टिन्य विमानस्थलबाट मोटरसाइकलको ब्रेकशुमा राखेर भन्सार छली छिराइएको क्वीन्टल (सय केजी) भनिएको सुनको तौल ६० केजी ७ सय १६ ग्राम ठहर भएकाे छ । 

बरामद ब्रेकशुलाई आज राष्ट्र बैंकको टक्सार महाशाखाले पगालेर सुन निकालेकाे हाे । सरोकारवाला निकाय र सुरक्षा निकायका प्रतिनिधिको रोहबरमा मंगलबार सुन पगालेर जाेख्दा याे परिमाणमा सुन ठहर भएकाे महाशाखाले जनाएकाे छ ।

यसमा कति परिमाण कुन गुणस्तरकाे सुन निस्कन्छ भन्ने कुरा थप जाँचेपछि मात्र थाहा हुने जानकारी महाशाखाले दिएकाे छ । पगालेपछि छुटिएको सुनलाई बिस्कुट आकारमा तयार पारिएको छ ।

यही सुन प्रकरणमाथि प्रहरीको केन्द्रीय अनुसन्धान ब्यूरो (सीआईबी)ले अनुसन्धान गरिहरेको छ । सुन तस्करीका कारण राजनीति समेत तरंगित हुन पुगेको छ । यही प्रकरणको अनुसन्धानले मात्र नहुने भन्दै उच्चस्तरीय छानबिन समिति गठनको माग गर्दै प्रमुख प्रतिपक्ष नेकपा (एमाले)ले प्रतिनिधिसभा र राष्ट्रियसभा बैठक साउन १० गतेदेखि अवरुद्ध पार्दै आइरहेको छ । 

सरकारले प्रकरणमाथि प्रहरीले अनुसन्धान गरिरहेको र यो बेला बाहिरबाट छुट्टै समिति गठन गर्दा अनुसन्धान नै प्रभावित हुने भन्दै समिति गठन गर्न अस्वीकार गर्दै आइरहेको छ ।

भन्सार छलेर विमानस्थलबाट बाहिर ल्याएको तस्करीका सुनलाई भन्सार विभागले सिनामंगलस्थित एक घरबाट नियन्त्रणमा लिएको थियो । तस्करी प्रकरणमा विभागले करिब हप्ता छानबिनपछि बरामद सुन र पक्राउ परेका आरोपीमाथि थप अनुसन्धानका लागि सीआईबीलाई जिम्मा दिएको थियो । प्रकरणमा हालसम्म चिनियाँ नागरिकसहित १८ जना पक्राउ परेका छन् ।