राष्ट्रपति पौडेल र एमाले अध्यक्ष ओलीबीच भेटवार्ता, जाँचबुझ आयोग गठन भए संसद सुचारु हुने जानकारी

३१ साउन, काठमाडौं । राष्ट्रपति रामचन्द्र पौडेल र प्रमुख प्रतिपक्षी दलका नेता केपी शर्मा ओलीबीच बुधबार शीतलनिवासमा भेटवार्ता भएको छ । राष्ट्रपतिसँगको भेटमा संसद अवरोधलगायतका समसामयिक राजनीतिक विषयमा छलफल भएको बताइएको छ । भेटमा राष्ट्रपति पौडेलले संसद अवरुद्धप्रति चिन्ता व्यक्त गरेका थिए । उनले सबै दल मिलेर संसदलाई सुचारु गर्नुपर्ने बताएका थिए । 

सुन तस्करी प्रकरणको उच्चस्तरीय छानबिन गर्नुपर्ने माग गर्दै नेकपा एमालेले १० साउनदेखि संसद अवरोध गरिरहेको छ । प्रमुख राजनीतिक दलहरूबीच यस विषयमा भएको छलफल निष्कर्षमा पुग्न सकेको छैन । यसै सन्दर्भमा राष्ट्रपति पौडेलले संसदको अवरोधबारे चासो राख्दै प्रधानमन्त्री र विपक्षी दलका नेतासँग भेट गरेका हुन् । पौडेलले प्रधानमन्त्री प्रचण्डसँग २५ साउनमा भेट गरेका थिए । 

राष्ट्रपतिसँगको भेट ओलीले सरकार सुन तस्करी प्रकरणलाई ओझेलमा पार्ने प्रयास गरिरहेको बताएका थिए । उनले उच्चस्तरीय जाँचबुझ आयोग बनाउन नमानेकोले सुन तस्करीमा सरकारको पनि संलग्नता रहेको आशंका बढेको बताएका थिए । उनले सुन तस्करी प्रकरणको छानविनका लागि उच्चस्तरको आयोग नबनाएर सरकारले नै संसद अवरुद्ध गराइरहेको ओलीको भनाइ थियो ।