नेप्से सूचक ८.०१ अंकले बढ्यो, कारोबार रकममा सोल्टी होटेल अग्रस्थानमा !

३२ साउन, काठमाडौं । शेयरबजारले बिहीबार सकारात्मक संकेत देखाएको छ । यस दिन नेप्से सूचक ८.०१ विन्दुले बढेर २०३३.१३ अंकमा आएको छ । १ अर्ब ५४ करोड रूपैयाँभन्दा बढीको शेयर कारोबार भएको छ । 

यसअघि विशेषगरी बजारमा ब्याजदर वृद्धिको हल्ला बेस्सरी चलेको थियो । सबै बैंकले बढाउन सक्ने अनुमान पनि भइरहेको थियो । तर ब्याजदर बढाउनेमात्र होइन, घटाउने बैंकहरु पनि भए । एक दर्जन बैंकले ब्याजदर बढाए पनि विशेषगरी ठूला र सबल बैंकहरुले भने ब्याजदर घटाए । केहीले स्थिर पनि राखे । 

यस दिन २७१ कम्पनीको ४० लाख ९ हजारभन्दा बढी कित्ता शेयर कारोबार भएको छ । १३ करोड ७१ लाख रूपैयाँसहित कारोबार रकममा सोल्टी होटेल अग्रस्थानमा रहेको छ । यसैगरी, दोस्रो र तेस्रो स्थानमा क्रमशः आइएमई लाइफ इन्सुरेन्स र घोराही सिमेन्ट्स परेका छन् ।