मुख्यमन्त्री थापाको प्रस्ताव उपसभामुखले मानिनन्, विश्वासको मत ४ गते मात्र लिइने

१ भदौ, काठमाडौं । कोशी प्रदेशका मुख्यमन्त्री उद्धव थापाले आउँदो आइतबार प्रदेशसभाबाट विश्वासको मत नलिने भएका छन् ।

उनले भदौ ३ गते आयतबारका लागि विश्वासको मत लिने व्यवस्थाका लागि समय तोक्न शुक्रबार सचिवालयमा पत्र दिएकामा उपसभामुख सिर्जना दनुवारले एक दिन पछाडि धकेलिदिएपछि ३ गतेका लागि राखिएकाे उनकाे प्रस्ताव सरेकाे हाे । 

दनुवारले थापाको पत्रमा भदौ ४ गते सोमबारका लागि विश्वासको मत लिने प्रस्ताव पेस गर्ने कार्यसूचीमा व्यवस्था गर्न तोक लगाइदिएकी छन् । 

प्रदेशसभा नियमावलीको १२८ को १ मा मुख्यमन्त्रीले विश्वासको मत लिने प्रस्ताव पेश गर्न सूचना दिने व्यवस्था छ । उपनियम ३ मा प्रदेश सचिवले सभामुखसमक्ष सूचना पेश गर्ने र सभामुखले विश्वासको मत लिने दिन र समय तोक्ने व्यवस्था छ । सभामुख पद रिक्त रहेको हुँदा उपसभामुखले विश्वासको मत लिनका लागि ४ गते दिउँसो १ बजेका लागि तोकेको सचिवालयले जनाएको छ । अब थापाले सोमबार मात्र विश्वासको मत लिने भएका छन् । 

साउन १६ गते नियुक्त भएका मुख्यमन्त्री थापाले भदौ १३ गते भित्र विश्वासको मत लिनुपर्ने संवैधानिक बाध्यता छ । ९३ सदस्यीय प्रदेशसभामा बहुमतका लागि ४७ मत चाहिन्छ । थापाको नेतृत्वमा सरकारलाई कांग्रेसका २९, माओवादी केन्द्रका १३, एकीकृत समाजवादी पार्टीका ४ र जसपाको एक गरी ४७ सांसदको समर्थन छ ।

विपक्षमा एमालेका ४० (उपसभामुखसहित) र राप्रपाका ६ जना सांसद छन् । एमाले प्रस्तावमाथि हुने मतदानमा बराबर बनाएर थापालाई बहुमत पुर्याउनबाट रोकेर संविधान धारा १६८ को उपधारा ३ बमोजिम प्रदेसभाका सबैभन्दा ठूलो दल एमालेको नेतृत्वमा सरकार गठन गर्ने दाउमा लागेको चर्चा कोशीमा सुन्न पाइन्छ ।