संसद्लाई बन्धक बनाउनु अराजनीतिक चरित्र : सभापति लामिछाने

१ भदौ, झापा । राष्ट्रिय स्वतन्त्र पार्टी (रास्वपा)का सभापति रवि लामिछानेले संसद्लाई बन्धक बनाउन नमिल्ने बताउका छन् । झापाको बिर्तामोडमा आज आयोजित सभालाई सम्बोधन गर्दै उनले राजनीतिक खिचातानीका कारण सांसद अवरुद्ध हुनु दुःखद भएको बताए । 

“जनताका धेरै कुरा उठाउनु छ, समस्याबारे बोल्नु छ”, उनले एमाले लक्षित गर्दै भने, “चाँडोभन्दा चाँडो सदन खुलाउनुस् । सुन तस्करी प्रकरणको अनुसन्धानमा उच्चस्तरीय छानबिन आयोगको माग राखेर एमालेले लगातार संसद् अवरुद्ध राजनीतिक होइन । कम्तीमा राजनीतिक चरित्र देखाउनुस् ।’

पूर्वउपप्रधानमन्त्री तथा गृहमन्त्रीसमेत रहेका सभापति लामिछानेले पुराना पार्टीका नेताहरूकै कारण युवाहरू विदेश पलायन हुने क्रम बढेको र देशमा बसेर केही गर्न सकिन्छ भन्ने विश्वास नै युवामा हराएर गएको टिप्पणी गरे ।

सुन प्रकरणमा संसदीय छानबिन समिति गठनको माग गर्दै एमालेले गएको साउन १० गतेदेखि संसदको दुवै सदन अवरुद्ध पार्दै आइरहेको छ । संसदको तल्लो सदन प्रतिनिधिसभाको अर्को बैठक यही भदौ ३ गते आइतबारका लागि बोलाइएको छ । 

सभामा पार्टीका महामन्त्री डा. मुकुल ढकाल, सङ्घीय संसद्का प्रमुख सचेतक सन्तोष परियार, सांसद निशा डाँगी, केन्द्रीय सदस्य रमेश प्रसाइलगायतका केन्द्रीय नेताहरुले सम्बोधन गरेका थिए । लामिछाने शनिबारसम्म झापामा रहनेछन् । रास्वपा सरकार बाहिर छ ।